مدینہ منورہ: مسجد نبویؐ کی لائبریری حج کے بعد آنے والے زائرین کے لیے علم و تحقیق کا مرکز بن گئی

مدینہ منورہ میں مسجد نبویؐ کی لائبریری نے حج کی ادائیگی کے بعد آنے والے زائرین کے لیے اپنے دروازے کھول دیے ہیں، جہاں دنیا بھر سے آنے والے مہمانوں کو ایک پرسکون اور روحانی ماحول میں علمی و تحقیقی سہولیات تک رسائی فراہم کی جارہی ہے۔

اسلامی دنیا کی قدیم ترین وقفی لائبریریوں میں شامل

عرب نیوز کے مطابق مسجد نبویؐ کی لائبریری اسلامی دنیا کی قدیم ترین وقفی لائبریریوں میں شمار ہوتی ہے اور صدیوں سے محققین، طلبہ اور علمائے کرام کے لیے علم و دانش کا ایک اہم مرکز رہی ہے۔

لائبریری کے مختلف شعبے

مرکزی لائبریری مسجد نبویؐ کے مغربی حصے میں سیڑھی نمبر 10 کے قریب واقع ہے، جبکہ خواتین محققین کے لیے مخصوص سہولیات شمالی جانب گیٹ نمبر 24 اور شمال مغربی سمت میں گیٹ نمبر 12 کے نزدیک قائم کی گئی ہیں۔

نایاب قلمی دستاویزات اور قیمتی ذخیرہ

لائبریری میں موجود غیر معمولی ذخیرے میں قریباً 4 ہزار اصل قدیم قلمی دستاویزات شامل ہیں، جبکہ قریباً 60 ہزار کو ڈیجیٹل اور تصویری شکل میں محفوظ کیا گیا ہے۔

اس کے علاوہ لائبریری میں 4 ہزار 600 سے زیادہ ملٹی میڈیا مواد موجود ہے، جبکہ قرآن مجید کے 250 سے زیادہ نایاب اور ہاتھ سے تحریر کردہ نسخے بھی محفوظ ہیں۔

محققین کے لیے خصوصی سہولیات

زائرین اور محققین کی سہولت کے لیے لائبریری میں مخطوطات ہال، نایاب کتب کا شعبہ اور آڈیو لائبریری سمیت مختلف خصوصی سیکشنز قائم ہیں۔

جدید ڈیجیٹل کیٹلاگنگ سروسز کے ذریعے محققین مطلوبہ مواد تک آسانی سے رسائی حاصل کر سکتے ہیں، جس سے عالمی اسلامی ورثے کے تحفظ اور فروغ کے مشن کو مزید تقویت مل رہی ہے۔