بلوچستان کے ضلع بسیمہ کے علاقے نال میں سیکیورٹی فورسز نے انٹیلیجنس معلومات پر مبنی ایک کامیاب کارروائی کے دوران بھارتی پراکسی ‘فتنہ الہندوستان’ کے 14 دہشت گردوں کو جہنم واصل کر دیا ہے۔ شدید فائرنگ کے تبادلے میں پاک فوج کا ایک بہادر جوان بھی وطن پر قربان ہو گیا۔
حملے کی بڑی منصوبہ بندی ناکام
پاک فوج کے شعبہ تعلقات عامہ (آئی ایس پی آر) کے مطابق 8 جون 2026 کو سیکیورٹی اداروں کو مصدقہ اطلاعات موصول ہوئی تھیں کہ بھارتی سرپرستی میں کام کرنے والے نیٹ ورک ‘فتنہ الہندوستان’ کے دہشتگرد نال کے علاقے میں روپوش ہیں اور وہ قریبی پولیس اسٹیشنز اور بینکوں پر بڑے حملوں کی گھناؤنی منصوبہ بندی کر رہے ہیں۔
یہ بھی پڑھیں:فتنہ الہندوستان و فتنہ الخوارج کا بزدلانہ حملہ، کوئٹہ کے قریب ٹرین پر معصوم شہری نشانہ بن گئے
اطلاعات ملتے ہی فورسز نے دہشتگردوں کے مذموم عزائم کو خاک میں ملانے کے لیے فوری اور مؤثر آپریشن کا آغاز کیا۔
دہشت گردوں کا گھیراؤ اور شدید جھڑپ
آئی ایس پی آر کے مطابق سیکیورٹی فورسز نے آپریشن کے دوران علاقے کو گھیرے میں لے کر دہشتگردوں کی نقل و حرکت کو مکمل طور پر روک دیا۔ خود کو محصور پا کر دہشتگردوں نے اندھا دھند فائرنگ شروع کر دی۔ فورسز کی بھرپور اور جوابی کارروائی میں 14 دہشتگرد ہلاک ہو گئے جبکہ متعدد شدید زخمی حالت میں پسپائی پر مجبور ہوئے۔
اسلحہ، گاڑیاں اور بارودی مواد تباہ
کامیاب آپریشن کے نتیجے میں دہشتگردوں کے قبضے سے بھاری مقدار میں اسلحہ برآمد ہوا، جبکہ ان کے زیر استعمال 4 گاڑیاں موقع پر ہی تباہ کر دی گئیں تاکہ ان کی فرار کی کوشش ناکام بنائی جا سکے۔ اس کے علاوہ دہشتگردوں کی جانب سے چھپایا گیا دیسی ساختہ دھماکا خیز مواد (آئی ای ڈیز) بھی برآمد کر کے ناکارہ بنا دیا گیا۔
لانس حوالدار محمد عباس کی لازوال شہادت
دہشتگردوں کے خلاف اس شدید ترین جھڑپ کے دوران پاک فوج کے ایک مایہ ناز سپوت، لانس حوالدار محمد عباس نے بہادری اور جوانمردی کی اعلیٰ مثال قائم کرتے ہوئے دشمن کا ڈٹ کر مقابلہ کیا اور وطنِ عزیز کی مٹی پر اپنی جان نچھاور کرتے ہوئے جامِ شہادت نوش کیا۔
‘عزمِ استحکام’ کے تحت مہم جاری رہے گی
آئی ایس پی آر کے مطابق مفرور دہشتگردوں کی ممکنہ موجودگی کے خاتمے کے لیے علاقے میں سرچ اور کلیئرنس آپریشن تاحال جاری ہے۔
مزید پڑھیں:بلوچستان کے ضلع واشک میں سیکیورٹی فورسز کا آپریشن، فتنہ الہندوستان کے 3 دہشتگرد ہلاک
آئی ایس پی آر نے عزم کا اعادہ کرتے ہوئے کہا کہ وفاقی ایپکس کمیٹی کے منظور کردہ قومی ایکشن پلان کے تحت ‘عزمِ استحکام’ وژن کے مطابق، پاکستان کی سیکیورٹی فورسز اور قانون نافذ کرنے والے ادارے بیرونی سرپرستی میں ہونے والی دہشت گردی کے مکمل خاتمے تک اپنی مہم پوری قوت سے جاری رکھیں گے۔
