فیفا ورلڈ کپ فٹبال 2026 کی تاریخ میں ایک نیا باب رقم ہونے کو تیار ہے۔ ٹورنامنٹ کی تاریخ میں پہلی بار، میزبانی کے فرائض انجام دینے والے تینوں ممالک، میکسیکو، کینیڈا اور امریکا اپنی اپنی الگ اور منفرد افتتاحی تقریبات کا انعقاد کریں گے۔
فٹبال اور موسیقی کا یہ جادوئی سنگم، جسے منتظمین نے ’تھرولوجی‘ (تین حصوں پر مشتمل جشن) کا نام دیا ہے، عالمی فٹبال ایونٹ کے آغاز کو ایک بالکل نئی اور یادگار الوداعی جہت دے گا۔
میکسیکو سے پہلے مرحلے کا آغاز، شکیرا اور برنا بوائے مدعو
جشن کے اس تاریخی سلسلے کا پہلا مرحلہ وہاں جمعرات اور یہاں پاکستان میں بدھ کو میکسیکو سٹی کے تاریخی ’استادیو ازٹیکا‘ اسٹیڈیم میں شروع ہوگا۔
یہ افتتاحی تقریب وہاں کے مقامی وقت کے مطابق صبح 11:30 بجے (امریکی مشرقی وقت کے مطابق دوپہر 1:30 بجے) سجائی جائے گی، جو میکسیکو اور جنوبی افریقہ کے درمیان کھیلے جانے والے افتتاحی میچ سے ٹھیک 90 منٹ قبل ہوگی۔
یہ بھی پڑھیں:فیفا ورلڈ کپ 2026: فٹبال قوانین میں نئی تبدیلیاں کیا ہیں؟
اس رنگا رنگ تقریب میں بین الاقوامی شہرت یافتہ پاپ اسٹار شکیرا اور نائجیرین سپر اسٹار برنا بوائے ورلڈ کپ کا آفیشل ترانہ ’ڈائی ڈائی‘ لائیو پرفارم کریں گے۔
ان کے علاوہ جے بالون، مانا اور ٹائلا سمیت دنیا بھر کے دیگر نامور فنکار بھی اپنے فن کا مظاہرہ کرکے شائقین کے لہو کو گرمائیں گے۔
دوسرا مرحلہ کینیڈا میں، ایلینس موریسیٹ اور مائیکل بوبلے کی پرفارمنس
افتتاحی جشن کی یہ لہر اگلے ہی دن جمعہ کو 12 جون کو کینیڈا کے شہر ٹورنٹو پہنچے گی، جہاں ’بی ایم او فیلڈ‘ میں دوسرے مرحلے کی تقریب منعقد ہوگی۔ کینیڈا میں یہ شو مشرقی وقت کے مطابق دوپہر 1:30 بجے شروع ہوگا۔
اس تقریب کی خاص بات کینیڈین موسیقی کی مایہ ناز شخصیات ایلینس موریسیٹ اور مائیکل بوبلے کی شاندار پرفارمنسز ہوں گی، جو ہوم گراؤنڈ پر اپنے مداحوں کے دل جیتیں گے۔
اختتامی شو امریکا میں، کیٹی پیری اور لیسا کا ہنگامہ
اس 3 ملکی افتتاحی سلسلے کا اختتام اسی روز (جمعہ، 12 جون) امریکا کے شہر لاس اینجلس کے جدید ترین ‘سوفائی اسٹیڈیم’ میں ہوگا۔
یہ آخری اور فائنل اوپننگ شو پیسیفک وقت کے مطابق شام 4:30 بجے (امریکی مشرقی وقت کے مطابق شام 7:30 بجے) شروع ہوگا۔
امریکا میں ہونے والے اس میگا شو کی قیادت عالمی پاپ آئیکن کیٹی پیری کریں گی، جبکہ ان کا ساتھ دینے کے لیے لیسا، فیوچر اور دیگر نامور ریپرز و فنکار اسٹیج پر جلوہ گر ہوں گے۔
لائیو نشریات کہاں دیکھیں؟
دنیا بھر کے اربوں فٹبال شائقین ان تاریخی تقریبات اور ورلڈ کپ کے تمام میچز کو ٹیلی ویژن پر ‘ٹیلی مونڈو’ کے ذریعے براہِ راست دیکھ سکیں گے۔
اس کے علاوہ ڈیجیٹل صارفین کے لیے ‘پیاکاک’ اور ‘ٹیوبی’ جیسے مقبول اسٹریمنگ پلیٹ فارمز پر بھی مفت براہِ راست نشریات دستیاب ہوں گی۔
یہ 3 ملکی افتتاحی تقریبات 2026 فیفا ورلڈ کپ کی اس منفرد حیثیت کو دنیا کے سامنے اجاگر کرتی ہیں، جو پہلی بار میکسیکو، کینیڈا اور امریکا کی مشترکہ میزبانی میں منعقد ہو رہا ہے۔
منتظمین اور شائقین دونوں ہی پرامید ہیں کہ یہ ایونٹ کھیل کی تاریخ کا سب سے بڑا اور کامیاب ترین ورلڈ کپ ثابت ہوگا۔
