امریکا میں ایک مسافر طیارے کے دورانِ پرواز پیش آنے والے خطرناک واقعے میں پاکستانی فضائیہ کے سابق افسر نے اپنی تربیت اور حوصلے کا مظاہرہ کرتے ہوئے جہاز کے عملے کے ساتھ مل کر ایک مشتعل مسافر کو قابو کرنے میں اہم کردار ادا کیا، جس پر دیگر مسافروں اور فضائی عملے نے ان کی بہادری کو سراہا۔
میڈیا رپورٹس کے مطابق 5 جون 2026 کو فرنٹیئر ایئرلائن کی پرواز نمبر 2407 لاس ویگاس سے واشنگٹن کے لیے روانہ ہوئی۔ طیارے میں 200 سے زائد مسافر موجود تھے کہ پرواز کے چند ہی منٹ بعد ایک مسافر کا رویہ اچانک انتہائی جارحانہ ہوگیا اور اس نے جہاز کے اندر ہنگامہ شروع کر دیا۔
یہ بھی پڑھیں:ایران امریکا کشیدگی کے باعث مشرقِ وسطیٰ کی پروازیں متاثر، عالمی ایئرلائنز الرٹ
عینی شاہدین کے مطابق مسافر بار بار جہاز کے اگلے حصے اور کاک پٹ کی جانب جانے کی کوشش کر رہا تھا، جبکہ اسے روکنے والے عملے کے ارکان کے ساتھ بھی مزاحمت اور بدسلوکی کر رہا تھا۔ صورتحال اس وقت تشویشناک ہوگئی جب خدشہ پیدا ہوا کہ وہ طیارے کے حساس حصوں یا ایمرجنسی دروازوں تک پہنچنے کی کوشش کر سکتا ہے۔
واقعے کے دوران کپتان نے مسافروں سے تعاون کی اپیل کی، جس کے بعد چند افراد نے فضائی عملے کی مدد کے لیے آگے بڑھ کر مشتعل شخص کو قابو کرنے کی کوشش کی۔ ان افراد میں پاکستان فضائیہ کے ریٹائرڈ اسکواڈرن لیڈر زاہد یعقوب عامر بھی شامل تھے، جو اس وقت امریکا میں پی ایچ ڈی فیلوشپ کے سلسلے میں مقیم ہیں۔
امریکی فلائٹ میں ایمرجنسی!پاک فضائیہ کے شاہین کا بڑا کارنامہ !
سینکڑوں مسافروں کی جانیں بچالیں ! زاہد عامر ہیرو بن گئے!!
پاکستانی سابق پائلٹ کا کمال!جہاز ہائی جیک ہونے والا تھا؟ pic.twitter.com/5mDgGSsR9v— WE News (@WENewsPk) June 11, 2026
سابق پاکستانی افسر نے خطرے کے باوجود صورتحال کو سنبھالنے میں کردار ادا کیا اور دیگر مسافروں کو بھی پُرسکون رہنے کی ہدایت کی۔ سامنے آنے والی ویڈیوز میں انہیں مسافروں سے گھبرانے کے بجائے تعاون کرنے اور ضرورت پڑنے پر طبی مدد فراہم کرنے کی اپیل کرتے ہوئے بھی دیکھا گیا۔
فضائی عملے نے بھی انتہائی مشکل حالات میں پیشہ ورانہ صلاحیت کا مظاہرہ کیا۔ ایک ایئر ہوسٹس، جو امریکی بحریہ سے وابستہ رہ چکی ہیں، نے مشتعل مسافر کو قابو کرنے اور مسافروں کے تحفظ کو یقینی بنانے میں اہم کردار ادا کیا۔
ہنگامی صورتحال کے باعث طیارے کو منزل پر پہنچنے سے تقریباً 2 گھنٹے قبل رینو تاہو ایئرپورٹ پر اتارنے کا فیصلہ کیا گیا، جہاں قانون نافذ کرنے والے اداروں نے پہنچ کر مذکورہ مسافر کو اپنی تحویل میں لے لیا۔
یہ بھی پڑھیں:امریکی بجٹ ایئرلائن اسپرٹ دیوالیہ، تمام اثاثے فروخت کرنے کا حکم
پرواز کے کپتان شان اور کوپائلٹ ٹکر نے کاک پٹ کو محفوظ رکھتے ہوئے جہاز کا کنٹرول برقرار رکھا اور کامیاب ہنگامی لینڈنگ مکمل کی۔ بعد ازاں ضروری کارروائی کے بعد پرواز تقریباً ڈھائی گھنٹے کی تاخیر سے دوبارہ اپنی منزل کی جانب روانہ ہوگئی۔
فرنٹیئر ایئرلائن نے واقعے پر مسافروں سے معذرت کی اور انہیں سفری سہولت کے طور پر کھانے کے اخراجات کے لیے 25 ڈالر کا کریڈٹ بھی فراہم کیا۔
مسافروں کے مطابق اگر بروقت کارروائی نہ کی جاتی تو صورتحال مزید سنگین ہوسکتی تھی۔ ان کا کہنا تھا کہ سابق پاکستانی فضائی افسر زاہد یعقوب عامر کی تربیت، تحمل اور جر-ت نے نہ صرف مسافروں کے اعتماد کو بحال رکھا بلکہ ایک ممکنہ بڑے حادثے سے بچاؤ میں بھی مدد دی۔
