پاکستان کے ایک نجی تعلیمی ادارے نے عالمی سطح پر ملک کے لیے غیر معمولی کامیابی حاصل کرلی۔
بین الاقوامی ادارے کیو ایس اسٹارز نے یونیورسٹی آف لاہور کو مجموعی طور پر فائیو اسٹار ریٹنگ اور ریٹڈ ایکسلنٹ کے اعزاز سے نواز دیا۔
یہ اعزاز عالمی شہرت یافتہ ادارے کواکیریلی سمنڈز (کیو ایس) کی جانب سے کیے گئے آزادانہ اور جامع جائزے کے بعد دیا گیا، جس میں یونیورسٹی کی کارکردگی کا مختلف اعشاریوں اور عالمی معیار کے مطابق تفصیلی تجزیہ کیا گیا۔
جاری کردہ نتائج کے مطابق یونیورسٹی آف لاہور نے 9 میں سے 7 اہم شعبوں میں فائیو اسٹار ریٹنگ حاصل کی۔ ان شعبوں میں تدریس، تحقیق، طلبہ و تدریسی سہولیات، روزگار کے مواقع، طبی تعلیم، ماحولیاتی اثرات، تنوع، مساوات اور شمولیتی نظام شامل ہیں۔
اسی طرح عالمی روابط اور بہتر انتظامی طرزِ حکمرانی کے شعبوں میں یونیورسٹی کو فور اسٹار ریٹنگ دی گئی۔
کیو ایس سٹارز کا جائزہ نظام روایتی عالمی رینکنگز سے مختلف تصور کیا جاتا ہے کیونکہ یہ جامعات کی کارکردگی کو صرف تعلیمی شہرت تک محدود نہیں رکھتا بلکہ تدریسی معیار، تحقیقی سرگرمیوں، طلبہ کی فلاح، روزگار کے امکانات، سماجی اثرات اور ادارہ جاتی استحکام سمیت متعدد پہلوؤں کی بنیاد پر جانچتا ہے۔
یہی وجہ ہے کہ اس نظام کے تحت حاصل ہونے والی درجہ بندی کو عالمی سطح پر غیر معمولی اہمیت حاصل ہے۔
یونیورسٹی آف لاہور پاکستان کی بڑی نجی جامعات میں شمار ہوتی ہے، جہاں اس وقت 35 ہزار سے زیادہ طلبہ انڈرگریجویٹ، گریجویٹ اور ڈاکٹریٹ پروگرامز میں زیرِ تعلیم ہیں۔
یونیورسٹی آف لاہور طب، انجینیئرنگ، کاروباری تعلیم، فنون، سماجی علوم اور جدید ٹیکنالوجی سمیت مختلف شعبوں میں 200 سے زیادہ تعلیمی پروگرامز پیش کررہی ہے۔
