کوئٹہ میں وکیل کے قتل کا الزام عمران خان پر لگانے پر تحریک انصاف نے مسلم لیگ ن کے رہنما عطا تارڑ کے خلاف قانونی کارروائی کا آغاز کر دیا ہے اور انہیں 10 ارب روپے ہرجانے کا نوٹس بھجوایا گیا ہے۔
پریس کانفرنس کے ذریعے عبدالرزاق شر کے قتل کا الزام چیئرمین تحریک انصاف پر رکھنے کا معاملہ
عطاء تارڑ کیخلاف سخت قانونی کارروائی کا آغاز
عطا تارڑ کیخلاف قانونی کارروائی کا آغاز چیئرمین تحریک انصاف کی ہدایت پر کیا گیا
چیئرمین تحریک انصاف کے وکیل بیرسٹر ابوذر سلمان خان نیازی نے… pic.twitter.com/ZveWrwXcKk
— PTI (@PTIofficial) June 12, 2023
پی ٹی آئی کے میڈیا سیل کے مطابق عطا تارڑ کے خلاف قانونی کارروائی کا آغاز چیئرمین تحریک انصاف کی ہدایت پر کیا گیا۔ جس کے بعد ان کے وکیل بیرسٹر ابو ذر سلمان نیازی نے وزیراعظم کے معاون خصوصی کو قانونی نوٹس بھجوایا۔
پی ٹی آئی کے مطابق عطا تارڑ سے ہرجانے کے طور پر ملنے والی رقم شوکت خانم اسپتال کو عطیہ کی جائے گی۔
مزید پڑھیں
قانونی نوٹس کے ذریعے چیئرمین تحریک انصاف عمران خان کے خلاف الزام تراشی پر عطا تارڑ کو 15 روز میں غیر مشروط معافی مانگنے کی مہلت دی گئی ہے۔
نوٹس میں کہا گیا ہے کہ عطا تارڑ فوری طور پر چیئرمین تحریک انصاف کے خلاف الزام تراشی ترک کریں اور اپنا بیان واپس لیں۔ معافی نہ مانگنے اور الزام تراشی سے رجوع نہ کرنے پر عطا تارڑ کے خلاف ہتک عزت قانون سمیت متعلقہ قوانین کے تحت سخت کارروائی کی جائے گی۔
واضح رہے کہ عمران خان کے خلاف بلوچستان ہائی کورٹ میں سنگین غداری کیس کی پیروی کرنے والے عبدالرزاق شر ایڈووکیٹ کو 6 جون کو فائرنگ کر کے قتل کر دیا گیا تھا۔
عبدالرزاق شر کے قتل کے بعد وزیراعظم کے معاون خصوصی عطا تارڑ نے پریس کانفرنس کرتے ہوئے کہا تھا کہ کوئٹہ میں وکیل کے قتل کا مقدمہ عمران خان کے خلاف درج کرائیں گے اور یہ اس سے بچ نہیں سکیں گے کیوں کہ مکمل تفتیش ہو گی۔
دوسری جانب ڈی آئی جی کوئٹہ نے ایڈووکیٹ عبدالرزاق شر کے قتل پر جے آئی ٹی بنانے کا مطالبہ کرتے ہوئے کہا تھا کہ وفاقی حکومت سے تحریری طور پر استدعا کریں گے کہ اس معاملے پر جے آئی ٹی بنائی جائے۔