وفاقی وزیر پیٹرولیم علی پرویز ملک نے کہا ہے کہ ایران اور امریکا کے درمیان جنگ بندی معاہدے کی جانب پیشرفت کے مثبت اثرات عالمی توانائی منڈیوں پر ظاہر ہونا شروع ہو گئے ہیں، جس کے نتیجے میں تیل کی قیمتوں میں کمی کا رجحان دیکھا جا رہا ہے۔
انہوں نے ’ایکس‘ پر اپنے بیان میں کہا کہ وزیراعظم شہباز شریف، فیلڈ مارشل، وزیر خارجہ اور وزیر داخلہ کی سفارتی کوششیں رنگ لا رہی ہیں اور خطے میں کشیدگی میں کمی کے امکانات بڑھ رہے ہیں۔ ان کا کہنا تھا کہ عالمی منڈی میں تیل کی قیمتوں میں کمی کے فوائد براہ راست عوام تک منتقل کیے جائیں گے۔
انشاء ﷲ وزیراعظم، فیلڈ مارشل، وزیرخارجہ اور وزیرداخلہ کی کاوشیں رنگ لا رہی ہیں کیونکہ ایران اور امریکہ جنگ بندی معاہدے پر دستخط کرنے کی طرف بڑھ رہے ہیں۔ بین الاقوامی تیل کی قیمتیں کم ہو رہی ہیں اور وزیراعظم نے ہدایت دی ہے کہ اس کا فائدہ عوام کو فوری طور پر منتقل کیا جائے۔ ایک… pic.twitter.com/POJ9oc9U0D
— Ali Pervaiz Malik (@AliPervaiz450) June 18, 2026
علی پرویز ملک کے مطابق وزیراعظم نے ہدایت دی ہے کہ قیمتوں میں کمی کا فائدہ فوری طور پر عوام کو دیا جائے، جس کے لیے ایک اعلیٰ سطحی کمیٹی تشکیل دی گئی ہے۔ یہ کمیٹی پیٹرولیم مصنوعات کی قیمتوں کے تعین کے لیے ایک شفاف ہفتہ وار فارمولہ مرتب کرے گی۔
انہوں نے کہا کہ نئے مجوزہ فارمولے کے تحت قیمتوں میں ردوبدل کی وجوہات عوام کے سامنے واضح طور پر رکھی جائیں گی تاکہ شفافیت کو یقینی بنایا جا سکے۔ ان کے مطابق اس فارمولے کو تمام متعلقہ اسٹیک ہولڈرز سے مشاورت کے بعد حتمی شکل دی جائے گی۔
یہ بھی پڑھیں:امریکا ایران عبوری امن معاہدہ، تیل کی قیمتوں میں کمی، عالمی منڈیوں میں مثبت رجحان
وفاقی وزیر نے مزید کہا کہ خطے میں کشیدگی کے باوجود حکومت نے ذمہ داری کا مظاہرہ کرتے ہوئے ملک میں تیل کی سپلائی چین کو بغیر کسی بڑی رکاوٹ کے برقرار رکھا۔ انہوں نے اس عمل میں تعاون کرنے والے تمام شراکت داروں اور عوام کا شکریہ ادا کیا۔
انہوں نے یہ بھی بتایا کہ موجودہ علاقائی صورتحال کے پیش نظر حکومت پاکستان اپنی توانائی سلامتی کی حکمت عملی پر بھی نظرثانی کر رہی ہے، اور آنے والے مہینوں میں توانائی کے شعبے میں متعدد اہم اصلاحات اور اقدامات متعارف کرائے جائیں گے تاکہ ملک کے اسٹریٹجک مفادات کا بہتر تحفظ کیا جا سکے۔
