حکومت پنجاب نے محرم الحرام کے دوران امن و امان اور مذہبی ہم آہنگی برقرار رکھنے کے لیے سیکیورٹی اور سائبر مانیٹرنگ کے اقدامات مزید سخت کر دیے ہیں۔
دوسری جانب سوشل میڈیا پر فرقہ وارانہ، نفرت انگیز اور اشتعال انگیز مواد کی روک تھام کیلئے محکمہ داخلہ میں خصوصی ڈیجیٹل میڈیا سیل قائم کر دیا گیا ہے۔
ترجمان محکمہ داخلہ پنجاب کے مطابق چیف سیکریٹری پنجاب نے محکمہ داخلہ میں قائم جدید ڈیجیٹل میڈیا سیل کا دورہ کیا اور محرم الحرام کے دوران سوشل میڈیا کی لائیو مانیٹرنگ کے عمل کا جائزہ لیا۔
یہ بھی پڑھیں: محرم الحرام میں سیکیورٹی خدشات، پنجاب میں 1421 ذاکرین و مقررین ضلع بند، 809 کی زباں بندی
اس موقع پر سیکرٹری داخلہ ڈاکٹر احمد جاوید قاضی نے چیف سیکریٹری کو سائبر مانیٹرنگ، سیکیورٹی انتظامات اور نفرت انگیز مواد کے خلاف کارروائیوں کے حوالے سے تفصیلی بریفنگ دی۔
بریفنگ میں بتایا گیا کہ پنجاب بھر میں محرم الحرام کے دوران 37 ہزار 868 مجالس اور 9 ہزار 412 جلوسوں کے لیے فول پروف سیکیورٹی انتظامات کیے گئے ہیں۔
امن و امان برقرار رکھنے کے لیے ایک لاکھ 25 ہزار سے زائد پولیس اہلکار تعینات کیے گئے ہیں، جبکہ پولیس کی معاونت کے لیے پاک آرمی کی 61 اور رینجرز کی 76 کمپنیاں بھی خدمات انجام دیں گی۔
ترجمان محکمہ داخلہ پنجاب
لاہور 19 جون:محرم الحرام کے دوران امن و امان برقرار رکھنے کیلئے حکومتِ پنجاب متحرک
سوشل میڈیا پر فرقہ وارانہ، نفرت انگیز اور متشدد مواد کی روک تھام کیلئے محکمہ داخلہ میں خصوصی سیل قائم
چیف سیکرٹری پنجاب کا محکمہ داخلہ میں جدید ڈیجیٹل میڈیا سیل کا… pic.twitter.com/fQsUiOJEiO
— Home Department Punjab (@homedptpunjab) June 19, 2026
حکام کے مطابق صوبے میں 1418 شعلہ بیاں مقررین کی ضلع بندی اور 794 افراد کی زباں بندی کے احکامات جاری کیے جا چکے ہیں۔
علاوہ ازیں 2505 افراد کو فورتھ شیڈول میں شامل کیا گیا ہے تاکہ کسی بھی ممکنہ شرانگیزی یا امن و امان کی خرابی کو روکا جا سکے۔
سیکریٹری داخلہ نے بریفنگ میں بتایا کہ محکمہ داخلہ کا ڈیجیٹل میڈیا سیل 24 گھنٹے سائبر پٹرولنگ کر رہا ہے اور سوشل میڈیا پر قابل اعتراض مواد کی فوری نشاندہی اور قانونی کارروائی کے لیے جدید نظام فعال ہے۔
مزید پڑھیں: پنجاب میں محرم الحرام سے متعلق سخت فیصلے، کن چیزوں پر پابندی ہوگی؟
سائبر پٹرولنگ کے دوران 16 ہزار سے زائد قابل اعتراض سوشل میڈیا اکاؤنٹس پاکستان ٹیلی کمیونیکیشن اتھارٹی کو رپورٹ کیے جا چکے ہیں۔
چیف سیکریٹری پنجاب نے ہدایت کی کہ مذہبی منافرت، فرقہ واریت اور اشتعال انگیز مواد پھیلانے والے سوشل میڈیا اکاؤنٹس کے خلاف فوری قانونی کارروائی عمل میں لائی جائے۔
انہوں نے کہا کہ امن و امان اور مذہبی ہم آہنگی برقرار رکھنا ہم سب کی قومی ذمہ داری ہے اور پُرامن محرم الحرام کو یقینی بنانے کے لیے نفرت پھیلانے والے عناصر کے ساتھ آہنی ہاتھوں سے نمٹا جائے گا۔
