لاہور میں قائم پاکستانی ٹیکنالوجی کمپنی ایوانسیون لمیٹڈ نے اعلان کیا ہے کہ اسے قطر، متحدہ عرب امارات اور سعودی عرب میں مجموعی طور پر 11.6 ملین امریکی ڈالر مالیت کے متعدد اہم منصوبے حاصل ہوئے ہیں۔
میڈیا رپورٹس کے مطابق ایوانسیون نے جمعہ کے روز پاکستان اسٹاک ایکسچینج کو ارسال کردہ نوٹس میں اس پیش رفت سے آگاہ کیا۔
کمپنی کے مطابق یہ منصوبے قطر، متحدہ عرب امارات اور سعودی عرب کے طویل المدتی قومی ترقیاتی وژن کی تکمیل میں اہم کردار ادا کریں گے۔
قطر میں 3.9 ملین ڈالر کے منصوبے
کمپنی کے مطابق قطر میں ایوانسیون کو 3.9 ملین ڈالر مالیت کے انفراسٹرکچر کی جدیدکاری کے متعدد منصوبے دیے گئے ہیں۔
ان منصوبوں کے تحت ایس سی اے ڈی اے اور بلڈنگ مینجمنٹ سسٹمز کی مکمل اپ گریڈیشن اور انضمام کیا جائے گا، جس میں آلات کی خریداری، تنصیب، سسٹم انٹیگریشن، ٹیسٹنگ، کمیشننگ، دستاویزات کی تیاری، تربیت اور حتمی حوالگی شامل ہیں۔
Avanceon Limited (AVN), a Pakistani technology company headquartered in Lahore, announced on Friday that it had secured multiple high-value projects across Qatar, the United Arab Emirates, and Saudi Arabia, totalling $11.6 million.
The Pakistan Stock Exchange was informed in a… pic.twitter.com/g3fypnJPst
— Abdullah Manzoor (@iabdullah278) June 19, 2026
نوٹس کے مطابق ایوانسیون ایک بڑے یوٹیلیٹی ادارے کے لیے ڈیزاسٹر ریکوری سلوشن کی جدید آپریشنز، مینٹیننس اور سپورٹ سروسز بھی فراہم کرے گی۔
کمپنی کا کہنا ہے کہ یہ منصوبے آپریشنل استحکام، ڈیجیٹل صلاحیتوں اور انفراسٹرکچر کی قابلِ اعتماد کارکردگی کو بہتر بنانے میں معاون ثابت ہوں گے۔
متحدہ عرب امارات میں توانائی کے شعبے کے منصوبے
ایوانسیون نے بتایا کہ متحدہ عرب امارات میں اسے معروف آئل اینڈ گیس آپریٹرز سے 6.3 ملین ڈالر مالیت کے منصوبے حاصل ہوئے ہیں۔
ان منصوبوں کے تحت جدید کنٹرول اور سیفٹی سلوشنز کی فراہمی اور انضمام کیا جائے گا تاکہ تیل و گیس کے کنوؤں کی محفوظ، قابلِ اعتماد اور مؤثر آپریشنز کو یقینی بنایا جا سکے۔
سعودی عرب میں ایس سی اے ڈی اے جدیدکاری منصوبہ
کمپنی نے مزید بتایا کہ اسے سعودی عرب میں 1.4 ملین ڈالر مالیت کا ایس سی اے ڈی اے جدیدکاری منصوبہ بھی حاصل ہوا ہے، جو اس کی مضبوط تکنیکی مہارت اور مؤثر عملدرآمد کی صلاحیتوں کا مظہر ہے۔
اس منصوبے کے تحت پرانے ہارڈویئر، سافٹ ویئر اور کنٹرول سسٹمز کو مکمل طور پر اپ گریڈ کیا جائے گا، جس سے آپریشنل نگرانی، سسٹم کی کارکردگی اور طویل المدتی قابلِ اعتماد صلاحیت میں اضافہ ہوگا جبکہ فرسودگی سے متعلق خطرات میں کمی آئے گی۔
مزید پڑھیں: ٹیکنالوجی کی دنیا کی 10 بڑی کمپنیاں پاکستانیوں کی اوسط عمر سے بھی کم عمر
کمپنی کے مطابق جدید بنایا جانے والا پلیٹ فارم سعودی عرب کے ڈیجیٹل تبدیلی اور انفراسٹرکچر کی ترقی کے اہداف سے ہم آہنگ ایک قابلِ توسیع اور مستقبل کے تقاضوں کے مطابق آٹومیشن بنیاد فراہم کرے گا۔
واضح رہے کہ ایوانسیون لمیٹڈ 26 مارچ 2003 کو پاکستان میں ایک نجی لمیٹڈ کمپنی کے طور پر قائم کی گئی تھی، جسے 31 مارچ 2008 کو پبلک لمیٹڈ کمپنی میں تبدیل کیا گیا۔
کمپنی آٹومیشن اور کنٹرول آلات کی تجارت اور متعلقہ تکنیکی خدمات کی فراہمی کے شعبے میں کام کرتی ہے۔
