وزیرِ دفاع خواجہ آصف نے کہا ہے کہ آزاد کشمیر میں امن و امان کو خراب کرنے کی بھارتی کوششیں ناکام بنا دی گئی ہیں۔
پارلیمنٹ ہاؤس میں صحافیوں سے گفتگو کرتے ہوئے انہوں نے کہا کہ کشمیر میں بعض عناصر بھارت کے ایجنڈے پر کام کر رہے ہیں، تاہم پاکستان کے مؤقف اور عوامی مزاحمت کے باعث ایسے تمام عزائم کامیاب نہیں ہو سکے۔
یہ بھی پڑھیں:معیشت آئی سی یو سے نکل گئی، اب ملک مالی استحکام کی جانب گامزن ہے، وزیر دفاع خواجہ آصف
میڈیا رپورٹ کے مطابق خواجہ آصف نے کہا کہ مقبوضہ کشمیر میں بدستور ظلم و ستم جاری ہے، جہاں سیاسی قیادت کو بھی سخت حالات اور جیلوں کا سامنا کرنا پڑا ہے، جبکہ کشمیری عوام نے بے مثال قربانیاں دی ہیں۔
وفاقی وزیر نے کہا کہ پاکستان کے خلاف سرگرم کسی بھی گروہ کے روابط اگر بھارت سے ثابت ہوں تو ان کے خلاف فیصلہ کن کارروائی ناگزیر ہے۔
انہوں نے بنوں میں پیش آنے والے افسوسناک واقعات کا حوالہ دیتے ہوئے کہا کہ معصوم شہریوں کو نشانہ بنانا قابلِ مذمت ہے، اور اب وقت آ گیا ہے کہ دہشتگردی کے خلاف قومی سطح پر متحد ہو کر فیصلہ کن جنگ لڑی جائے۔
یہ بھی پڑھیں:عوامی ایکشن کمیٹی آزاد کشمیر میں انتخابی عمل کو سبوتاژ کرنا چاہتی ہے، وزیر دفاع خواجہ آصف
خواجہ آصف کا کہنا تھا کہ پاکستان میں دہشتگردی کے پیچھے بھارت اور افغانستان کے عناصر ملوث ہیں، اور حالیہ برسوں میں خطے کی صورتحال مزید پیچیدہ ہوئی ہے۔
انہوں نے زور دیا کہ ملک کے ہر حصے میں امن کے قیام کے لیے مشترکہ اور مؤثر حکمت عملی اختیار کرنا ضروری ہے۔
