بھارتی ریاست کیرالہ کے ضلع تھریسور میں انسدادِ منشیات فورس نے کارروائی کرتے ہوئے 2 خواتین سمیت 7 افراد کو منشیات اسمگلنگ کے الزام میں گرفتار کر لیا، جبکہ مجموعی طور پر 308 گرام ایم ڈی ایم اے برآمد کر لی گئی۔
پولیس کے مطابق کارروائی کا آغاز تھریسور کے علاقے ونیام پرا میں معمول کی گاڑیوں کی چیکنگ کے دوران ہوا، جہاں پالکڑ کے ایک ریزورٹ سے تھریسور آنے والی ایک سوئفٹ کار کو روک کر تلاشی لی گئی۔
یہ بھی پڑھیں: بھارت منشیات فروشی کا گڑھ بن گیا، کروڑوں زندگیاں داؤ پر، امریکی انٹیلیجنس رپورٹ
تلاشی کے دوران ایک خاتون کے جسم کے حساس حصے میں مبینہ طور پر چھپائے گئے دو گرام ایم ڈی ایم اے برآمد ہوئے، جس کے بعد پولیس نے تحقیقات کا دائرہ وسیع کر دیا۔
گرفتار ملزمان میں 26 سالہ شِفاس، 28 سالہ ودیا، 27 سالہ جِشنو اور 20 سالہ سری لکشمی شامل ہیں، جن کا تعلق گرووایور-پاورتی علاقے سے بتایا گیا ہے۔
യുവതിയുടെ അടിവസ്ത്രത്തില് എംഡിഎംഎ; ഉപയോഗിക്കുന്നത് രാത്രി ജോലിക്കിടെ ഉറങ്ങാതിരിക്കാന് https://t.co/QQHkq8Ksk4
— Manorama News (@manoramanews) June 27, 2026
ملزمان سے تفتیش کے بعد پولیس نے شِفاس کے گھر پر چھاپہ مارا، جہاں سے مزید 18 گرام ایم ڈی ایم اے برآمد ہوئی۔
مزید تحقیقات کے دوران پولیس نے چاوکڑ کے علاقے پنچرامکّو میں واقع ایک ایلومینیم فیبریکیشن ورکشاپ پر کارروائی کی، جہاں ایک پیکٹ میں چھپائے گئے 3 لفافوں سے مزید 288 گرام ایم ڈی ایم اے برآمد کی گئی۔
اس دوران پولیس نے شبیر (34)، انشاد (31) اور ٹی ٹی سومیش (25) کو بھی گرفتار کر لیا، جنہیں منشیات اسمگلنگ کے مبینہ نیٹ ورک کا حصہ قرار دیا جا رہا ہے۔
پولیس کا کہنا ہے کہ ملزمان کے موبائل فونز سے حاصل ہونے والے شواہد کی مدد سے دیگر مشتبہ افراد تک رسائی حاصل ہوئی اور منشیات کی بڑی کھیپ برآمد کی جا سکی۔
حکام کے مطابق اس کارروائی میں مجموعی طور پر 308 گرام ایم ڈی ایم اے ضبط کی گئی، جسے حالیہ مہینوں میں تھریسور ضلع میں ہونے والی بڑی انسدادِ منشیات کارروائیوں میں سے ایک قرار دیا جا رہا ہے۔
