وزیر اعلیٰ بلوچستان میر سرفراز بگٹی نے کہا ہے کہ بلوچستان کی تحصیل کنگری، ضلع موسیٰ خیل کے زلزلہ متاثرہ عوام کو تنہا نہیں چھوڑیں گے۔
اپنے ایک بیان میں انہوں نے کہاکہ متاثرہ علاقوں میں نقصانات کا جامع جائزہ لیا جا رہا ہے اور متاثرہ خاندانوں کو فوری امداد کی فراہمی یقینی بنائی جا رہی ہے۔
وزیر اعلیٰ بلوچستان میر سرفراز بگٹی کا کہنا تھا کہ حکومت بلوچستان ہر متاثرہ شہری کی بحالی تک ان کے شانہ بشانہ کھڑی رہے گی اور ہر ممکن تعاون فراہم کرے گی۔
انہوں نے مزید کہا کہ ریلیف، بحالی اور تعمیرِ نو کے تمام اقدامات شفافیت، تیز رفتاری اور مؤثر انداز میں جاری رکھے جائیں گے۔
واضح رہے کہ بلوچستان کے مختلف علاقوں میں آنے والے زلزلے سے ہونے والے واقعات میں 19 افراد زخمی ہوگئے، جبکہ 125 مکانات متاثر ہوئے۔
گزشتہ روز وزیراعظم شہباز شریف نے ہدایت کی تھی کہ زلزلہ متاثرین کو ہرممکن ریلیف فراہم کیا جائے۔
