اسلام آباد ہائیکورٹ میں موسمِ گرما کی 2 ماہ پر مشتمل تعطیلات کل سے شروع ہوں گی۔
چیف جسٹس سرفراز ڈوگر کی منظوری سے تعطیلات کے دوران ججز کی دستیابی، عدالتی اوقاتِ کار اور اہم مقدمات کی سماعت سے متعلق شیڈول جاری کر دیا گیا ہے۔
ڈپٹی رجسٹرار جنرل کی جانب سے جاری آفس آرڈر کے مطابق چیف جسٹس سرفراز ڈوگر گرمیوں کی تعطیلات کے دوران بھی دستیاب رہیں گے اور چھٹی نہیں کریں گے۔
یہ بھی پڑھیں: علیحدگی کی صورت میں بیوی کا جہیز، تحائف ہڑپ کرنے کی کوششوں کیخلاف اسلام آباد ہائیکورٹ کا اہم فیصلہ
شیڈول کے مطابق جسٹس سردار اعجاز اسحاق خان جولائی کے دوران دستیاب رہیں گے جبکہ اگست میں چھٹی پر ہوں گے۔
جسٹس ارباب محمد طاہر یکم سے 14 جولائی تک دستیاب رہیں گے جبکہ 15 سے 31 جولائی تک چھٹی کریں گے۔
اسی طرح وہ یکم سے 16 اگست تک دستیاب ہوں گے جبکہ 17 سے 31 اگست تک چھٹی پر رہیں گے۔
بریکنگ نیوز: اسلام آباد ہائیکورٹ کے چیف جسٹس سردار محمد سرفراز ڈوگر گرمیوں کی دو مہینوں کی تعطیلات میں کوئی چھٹی نہیں کریں گے بلکہ چھٹیوں کے دونوں مہینوں جولائی اور اگست میں مکمل دستیاب رہیں گے، کل سے شروع ہونے والی تعطیلات میں ججز کی چھٹیوں اور دستیابی کا شیڈول چیف جسٹس کی… pic.twitter.com/Qx8mbdKnyi
— Ehtsham Kiani (@ehtshamkiani) June 30, 2026
آفس آرڈر کے مطابق جسٹس خادم حسین سومرو جولائی میں تعطیلات پر ہوں گے اور اگست میں دستیاب رہیں گے، جبکہ جسٹس محمد اعظم خان جولائی میں دستیاب اور اگست میں چھٹی پر ہوں گے۔
جسٹس محمد آصف جولائی میں تعطیلات گزاریں گے جبکہ اگست میں فرائض انجام دیں گے۔
اسی طرح جسٹس انعام امین منہاس یکم سے 26 جولائی تک دستیاب رہیں گے، جس کے بعد 31 اگست تک چھٹی پر ہوں گے۔
عدالت کی جانب سے جاری شیڈول کے مطابق گرمیوں کی تعطیلات کے دوران ضمانت قبل از گرفتاری، ضمانت بعد از گرفتاری، حبسِ بے جا کے مقدمات، پہلے سے مقرر (فکس) کیسز، اسٹے آرڈر سے متعلق معاملات اور دیگر فوری نوعیت کے مقدمات کی سماعت جاری رہے گی۔
مزید پڑھیں: بار بار ایک جیسے آرڈرز کیوں؟ پاسپورٹ سے متعلق مقدمات پر اسلام آباد ہائیکورٹ کی ناراضی
آفس آرڈر میں کہا گیا ہے کہ تعطیلات کے دوران بھی دائری برانچ مقدمات کی فائلنگ کے لیے کھلی رہے گی تاکہ سائلین کو مقدمات دائر کرنے میں دشواری کا سامنا نہ کرنا پڑے۔
تعطیلات کے دوران عدالتی اوقاتِ کار پیر سے جمعرات اور ہفتہ صبح 9:30 بجے سے دوپہر 2:00 بجے تک ہوں گے، جبکہ جمعہ کے روز عدالت صبح 9:30 بجے سے دوپہر 12:00 بجے تک کام کرے گی۔
اسی طرح اسلام آباد ہائیکورٹ کے دفاتر پیر سے جمعرات اور ہفتہ صبح 9:00 بجے سے سہ پہر 3:30 بجے تک کھلے رہیں گے، جبکہ جمعہ کے روز دفتری اوقات صبح 9:00 بجے سے دوپہر 12:30 بجے تک ہوں گے۔
