سابق وزیراعظم و صدر پاکستان مسلم لیگ ن نواز شریف نے لاہور میں ٹیوشن سینٹر کی چھت گرنے سے 14 معصوم بچوں کے جاں بحق ہونے پر گہرے دکھ اور افسوس کا اظہار کیا ہے۔
’ایکس‘ پر اپنے ایک بیان میں نواز شریف نے کہاکہ چھت گرنے سے 14 بے گناہ بچوں کی المناک موت پر انہیں شدید رنج پہنچا ہے، یہ ننھے پھول قوم کا مستقبل تھے۔
لاہور میں چھت گرنے سے 14 معصوم بچوں کے المناک جانی نقصان پر دلی رنج ہوا۔ یہ ننھے پھول قوم کا مستقبل تھے۔ دکھ کی اس گھڑی میں میری ہمدردیاں سوگوار خاندانوں کے ساتھ ہیں۔ مریم نواز شریف نے مجھے بتایا ہے کہ وہ مصمم ارادے کے ساتھ اس افسوسناک واقعے کی شفاف اور غیرجانبدارانہ انکوائری…
— Nawaz Sharif (@NawazSharifMNS) July 1, 2026
انہوں نے کہاکہ غم کی اس گھڑی میں ان کی تمام تر ہمدردیاں سوگوار خاندانوں کے ساتھ ہیں۔
نواز شریف نے کہاکہ وزیراعلیٰ پنجاب مریم نواز شریف نے انہیں آگاہ کیا ہے کہ وہ اس افسوسناک واقعے کی شفاف اور غیر جانبدارانہ تحقیقات کرانے کے لیے پرعزم ہیں اور اس بات کو یقینی بنایا جائے گا کہ اس سانحے کے ذمہ داروں کو مثالی سزا ملے۔
انہوں نے دعا کی کہ اللہ تعالیٰ جاں بحق ہونے والے بچوں کو اپنی رحمت میں جگہ عطا فرمائے، زخمیوں کو مکمل صحت یاب کرے اور لواحقین کو صبرِ جمیل عطا فرمائے۔
واضح رہے کہ گزشتہ روز لاہور کے علاقے کاہنہ میں ٹیوشن سینٹر کی چھت گرنے سے 14 معصوم بچے جاں بحق ہوگئے تھے۔
