سندھ طاس معاہدے پر کوئی سمجھوتا نہیں کریں گے، جنگ لڑنا پڑی تو لڑیں گے، بلاول بھٹو زرداری

گلگت میں حلف برداری کی مرکزی تقریب سے خطاب کرتے ہوئے چیئرمین پیپلز پارٹی بلاول بھٹو زرداری نے کہا ہے کہ بھارت سندھ طاس معاہدے کو ہتھیار کے طور پر استعمال کرنا چاہتا ہے، لیکن ہم اس پر کسی صورت سمجھوتا نہیں کریں گے۔ اگر ہمیں اس کے لیے جنگ لڑنا پڑی تو ہم وہ بھی لڑیں گے۔

بلاول بھٹو زرداری نے گلگت بلتستان کے عوام کی قربانیوں کو زبردست خراج تحسین پیش کیا اور کہا کہ یہاں کے عوام محب وطن پاکستانی ہیں۔ گلگت کے عوام آج بھی شہید ذوالفقار علی بھٹو کی قربانیوں کو یاد کرتے ہیں، جنہوں نے اس خطے کی ترقی اور آزادی کے لیے جدوجہد کی۔

مزید پڑھیں: وزیراعظم آزاد کشمیر سے بلاول بھٹو زرداری کی ملاقات، آئندہ انتخابات پر تبادلہ خیال

چیئرمین پیپلز پارٹی نے مزید کہا کہ گلگت بلتستان کے عوام نے ڈوگرہ راج سے آزادی حاصل کر کے تاریخ میں ایک نمایاں مقام بنایا ہے۔ ان کا مینڈیٹ ہمارے لیے ایک بھاری ذمہ داری ہے اور نوجوانوں کو بہترین مواقع فراہم کرنا ہماری ترجیح ہے۔

لائیو: نومنتخب وزیراعلی گلگت بلتستان کی تقریب حلف برداری https://t.co/mvsl8xz2Gu

— PPP (@MediaCellPPP) July 6, 2026

ان کا کہنا تھا کہ ہم تمام سیاسی جماعتوں کے ساتھ مل کر ملک کی خدمت کریں گے اور وزیراعظم شہباز شریف اور مسلم لیگ ن کا شکریہ ادا کرتے ہیں جنہوں نے گلگت بلتستان میں عوام کے مینڈیٹ کو تسلیم کیا۔

بلاول بھٹو نے افواج پاکستان کی بہادری کی بھی تعریف کی اور مودی کو متنبہ کیا کہ ان کی کسی بھی سازش کو کامیاب نہیں ہونے دیں گے۔