چین کے معروف ماہر اور سینٹر فار گلوبلائزیشن کے نائب صدر ڈاکٹر وکٹر گاؤ نے وزیراعظم پاکستان محمد شہباز شریف اور فیلڈ مارشل عاصم منیر کے اقدامات کو سراہتے ہوئے کہا ہے کہ دونوں رہنما امن اور استحکام کے لیے اپنی کوششیں جاری رکھیں تو نوبیل امن انعام کے حقدار بن سکتے ہیں۔
ایک تقریب سے خطاب کرتے ہوئے ڈاکٹر وکٹر گاؤ نے کہا کہ پاکستان کی قیادت کی جانب سے اختیار کی گئی مثبت حکمتِ عملی قابلِ تحسین ہے۔ انہوں نے امید ظاہر کی کہ اگر وزیراعظم شہباز شریف اور فیلڈ مارشل عاصم منیر اسی سمت میں کام کرتے رہے تو وہ مستقبل میں امن کے نوبیل انعام کے لیے مضبوط امیدوار ہو سکتے ہیں۔
یہ بھی پڑھیے بھارت کی جانب سے پاکستان کا پانی روکنے کی دھمکی انسانیت کے خلاف جرم ہے، ڈاکٹر وکٹر گاؤ
انہوں نے کہا کہ ان کی خواہش ہے کہ پاکستانی قیادت خطے میں امن، استحکام اور ترقی کے لیے اپنی کوششیں جاری رکھے، تاکہ یہ دونوں شخصیات انفرادی طور پر یا مشترکہ طور پر اس عالمی اعزاز کی حق دار قرار دی جا سکیں۔
ڈاکٹر وکٹر گاؤ چین میں عالمی امور اور معاشی روابط کے حوالے سے ایک معروف ماہر سمجھے جاتے ہیں اور وہ مختلف عالمی فورمز پر علاقائی تعاون اور امن کے فروغ سے متعلق اظہارِ خیال کرتے رہے ہیں۔
