ازبکستان کی سیکیورٹی فورسز نے افغانستان سے ڈرون کے ذریعے منشیات اسمگل کرنے کی کوشش ناکام بناتے ہوئے دو کلوگرام سے زائد افیون برآمد کر لی۔ حکام کے مطابق یہ پہلا موقع ہے جب افغانستان سے ڈرون کے ذریعے منشیات اسمگل کرنے کی کوشش سامنے آئی ہے۔
ازبک میڈیا کے مطابق ازبکستان کی ریاستی سیکیورٹی سروس نے افغانستان سے متصل سرحد پر ڈرون کے ذریعے منشیات اسمگل کرنے کی کوشش ناکام بنا دی ہے۔
Uzbek security forces prevented drug smuggling by drone from Afghanistan to the Sarkhan Darya region; 2 kilograms and 32 grams of opium were discovered in the drone. Afghanistan under Taliban rule remains one of the world's main sources of illicit drug production. pic.twitter.com/hdSRDokhEM
— Political Base Abdul Maroof Azadmanish (@PoliticalBaseMA) July 5, 2026
حکام نے بتایا کہ نامعلوم افراد نے دریائے آمو کے افغان کنارے سے ایک ڈرون کے ساتھ دو کلوگرام سے زائد افیون باندھ کر اسے ازبکستان کے صوبہ سرخندریا کی جانب روانہ کیا۔ تاہم سیکیورٹی فورسز کے فوری ردعمل کے نتیجے میں ڈرون کو اپنی منزل تک پہنچنے سے پہلے ہی روک کر قبضے میں لے لیا گیا۔
ریاستی سیکیورٹی سروس کے مطابق واقعے کے بعد تحقیقات کا آغاز کر دیا گیا ہے اور ڈرون روانہ کرنے والوں کی شناخت کے لیے کارروائی جاری ہے۔ تفتیش کے دوران ڈرون کے لانچنگ مقام، منشیات کی متوقع منزل اور سرخندریا میں ممکنہ سہولت کاروں کا بھی تعین کیا جائے گا۔
یہ بھی پڑھیں:افغانستان: کابل یونیورسٹی میں دھماکا، 20 کے قریب طلبہ زخمی
ازبک حکام کے مطابق طالبان کے افغانستان میں دوبارہ برسرِ اقتدار آنے کے بعد ملک میں افغانستان سے آنے والی منشیات کی متعدد کھیپیں پکڑی جا چکی ہیں، تاہم ڈرون کے ذریعے سرحد پار منشیات اسمگل کرنے کی یہ پہلی رپورٹ ہے۔
سیکیورٹی حکام نے واقعے کے حوالے سے فوجداری مقدمہ درج کر کے مزید تحقیقات شروع کر دی ہیں۔
