فٹ بال کی دنیا کے سب سے معتبر ترین اعزاز ‘فیفا ورلڈ کپ ٹرافی’ کو نیویارک نیو جرسی اسٹیڈیم تک لانے کے لیے فرانسیسی لگژری فیشن ہاؤس ‘لوئی ویغوں’ نے ایک مخصوص اور پرتعیش ٹرنک (بکس) تیار کیا ہے۔ فٹ بال کی تاریخ کے اس سب سے قیمتی انعام کی حفاظت اور نقل و حمل کے لیے اس معروف فرانسیسی برانڈ پر ایک بار پھر بھروسہ کیا گیا ہے۔
اس خصوصی طور پر تیار کردہ بکس کے سامنے کے حصے پر سنہری رنگ سے انگریزی کا حرف’V‘ نقش کیا گیا ہے، جو ایک طرف فتح (Victory) کی علامت ہے تو دوسری طرف برانڈ کے نام (Vuitton) کو ظاہر کرتا ہے۔ بکس کے بیرونی حصے پر کمپنی کا روایتی مونوگرام اور کناروں پر سونے کا ملمع چڑھے پیتل کے حفاظتی کوور لگائے گئے ہیں۔ ٹرنک کا اندرونی حصہ ہلکے بھورے (Beige) چمڑے سے تیار کیا گیا ہے، جس پر فیفا اور لوئی ویغوں کے مابین شراکت داری کی یادگاری مہر بھی کندہ ہے۔
یہ بھی پڑھیے فیفا ورلڈ کپ 2026 کے فائنل کی پچ کے ٹکڑے فروخت کرے گا، لاکھوں ڈالر آمدن کی توقع
یہ مسلسل پانچواں ورلڈ کپ ٹورنامنٹ ہے جس میں اس فرانسیسی کمپنی نے ٹرافی کے لیے بکس ڈیزائن کیا ہے۔ اس سے قبل لوئی ویغوں 2010، 2014، 2018 اور 2022 کے عالمی کپ ٹورنامنٹس کے لیے بھی یہ خدمات انجام دے چکا ہے۔
لوئی ویغوں کے چیئرمین اور سی ای او پیٹرو بیکاری نے اپنے ایک بیان میں کہا ’ایک دہائی سے زائد عرصے سے لوئی ویغوں اور فیفا بہترین کارکردگی کے عزم پر یکجا ہیں۔ ہمارا یہ رشتہ اس مشترکہ یقین پر قائم ہے کہ کھیل لوگوں کو یکجا کرنے اور انہیں ترغیب دینے کی بے پناہ طاقت رکھتا ہے۔‘
یہ بھی پڑھیے فیفا فٹبال میں چھپی صدی کی کہانی
پرتعیش برانڈز طویل عرصے سے پیشہ ورانہ کھیلوں کی دنیا میں اپنی پہچان بنا رہے ہیں۔ مثال کے طور پر ‘ٹفنی اینڈ کو’ (Tiffany & Co) 1967 میں منعقد ہونے والے سپر باؤل کے پہلے ایڈیشن سے لے کر اب تک فاتحین کے لیے خصوصی ٹرافی تیار کر رہا ہے، جسے اب ‘ونس لومبارڈی ٹرافی’ کے نام سے جانا جاتا ہے۔ اسی طرح لوئی ویغوں فارمولا ون کے ساتھ 10 سالہ معاہدے کے تحت بڑے گرینڈ پری مقابلوں کے لیے بھی مخصوص لگژری ٹرافی بکس تیار کرتا ہے۔
تاہم، ہر 4 سال بعد منعقد ہونے والے فٹ بال کے اس عالمی میلے کی اصل ٹرافی صرف ایک ہی ہے جو عام طور پر زیورخ میں فیفا کے میوزیم میں رکھی جاتی ہے۔ یہی وجہ ہے کہ اس نایاب اور تاریخی ٹرافی کے لیے سفری بیگ ڈیزائن کرنا کسی بھی عالمی برانڈ کے لیے ایک انتہائی غیر معمولی اور منفرد اعزاز سمجھا جاتا ہے۔
