پرتگال کے اسٹار فٹبالر کرسٹیانو رونالڈو ایک نئے تنازع کا حصہ بن گئے ہیں جب ان کے تصدیق شدہ انسٹاگرام اکاؤنٹ سے ایک ایسی ویڈیو کو لائیک کیے جانے کی اطلاعات سامنے آئیں، جس میں دعویٰ کیا گیا تھا کہ فیفا نے لیونل میسی کی قیادت میں ارجنٹینا کو ورلڈ کپ 2026 کے فائنل تک پہنچانے میں مدد دی۔
سوشل میڈیا پر وائرل ہونے والے اسکرین شاٹس کے مطابق رونالڈو کے تصدیق شدہ اکاؤنٹ نے ہسپانوی ٹی وی پروگرام کی ایک انسٹاگرام ریِل کو لائیک کیا۔ ویڈیو میں صحافی پیلار روڈریگیز لوسانتوس نے ارجنٹینا کے فائنل تک پہنچنے کے سفر پر سوالات اٹھاتے ہوئے فیفا پر جانبداری اور بدعنوانی کے الزامات عائد کیے۔
Cristiano Ronaldo likes Instagram video accusing FIFA of corruption and alleging that they helped Argentina reach the World Cup final. pic.twitter.com/Lbk1MTlo0R
— Pop Base (@PopBase) July 20, 2026
صحافی نے دعویٰ کیا کہ ارجنٹینا کو کئی مواقع پر ٹورنامنٹ سے باہر ہونا چاہیے تھا تاہم فیفا کی مبینہ معاونت کے باعث ٹیم فائنل تک پہنچی۔
رونالڈو نے تاحال اس معاملے پر کوئی عوامی بیان جاری نہیں کیا اور نہ ہی یہ وضاحت کی ہے کہ مذکورہ پوسٹ کو لائیک کرنے کی وجہ کیا تھی۔
یہ بھی پڑھیں: ’ٹرمپ ہر جگہ توجہ چاہتے ہیں‘، فیفا ورلڈ کپ ٹرافی کی تقریب میں اسٹیج نہ چھوڑنے پر امریکی صدر پر تنقید
یہ معاملہ ایسے وقت میں سامنے آیا ہے جب ورلڈ کپ 2026 پہلے ہی مختلف تنازعات کی وجہ سے خبروں میں رہا ہے جن میں احتجاج، ٹکٹوں کی قیمتوں پر تنقید، ویزا مسائل اور دیگر انتظامی معاملات شامل ہیں۔
واضح رہے کہ فیفا کی جانب سے ارجنٹینا کے حق میں جانبداری یا کسی بھی قسم کی معاونت کے الزامات کی باضابطہ تصدیق نہیں ہوئی جبکہ رونالڈو نے بھی اس حوالے سے کوئی تبصرہ نہیں کیا۔
