پاکستان نے ایمنسٹی انٹرنیشنل کی اس رپورٹ کو مسترد کرتے ہوئے کہا ہے جس میں افغانستان کے دارالحکومت کابل میں ایک منشیات بحالی مرکز کو نشانہ بنانے کا الزام عائد کیا گیا تھا۔ مؤقف اختیار کیا گیا ہے کہ رپورٹ عدالتی فیصلہ نہیں بلکہ ایک وکالتی نوعیت کی رائے ہے، جس میں پاکستان کی انٹیلیجنس معلومات، ہدف کے تعین کے طریقہ کار اور سیکیورٹی تناظر کو شامل نہیں کیا گیا۔
مزید پڑھیں: گرفتار خارجی سہولتکار کے دہشتگردی اور بھتہ خوری سے متعلق اہم انکشافات، غیر قانونی مدارس کی نگرانی پر زور
بیان میں کہا گیا ہے کہ پاکستان نے کسی اسپتال یا بحالی مرکز کو جان بوجھ کر نشانہ نہیں بنایا بلکہ کارروائیاں دہشتگردوں کے ٹھکانوں، اسلحہ گوداموں، ڈرون سے متعلق تنصیبات اور دہشتگرد گروہوں کی معاونت کرنے والے ڈھانچے کے خلاف کی گئیں۔
پاکستان کے مطابق ان کارروائیوں میں درست نشانہ لگانے والے ہتھیار استعمال کیے گئے اور ثانوی دھماکوں سے فوجی سازوسامان کی موجودگی کی تصدیق ہوتی ہے۔
بیان میں زور دیا گیا کہ شہری ہلاکتیں افسوسناک ہیں اور ان کی غیر جانبدارانہ تحقیقات ہونی چاہئیں، تاہم تحقیقات میں دہشتگردی کے پس منظر، افغان سرزمین پر کالعدم تحریک طالبان پاکستان (ٹی ٹی پی) سمیت دہشتگرد گروہوں کی موجودگی اور افغان حکام کی ذمہ داریوں کا بھی جائزہ لیا جانا چاہیے۔
— Markhor Pakistan (@AabparaX) July 22, 2026
پاکستان نے کہا کہ وہ ایسی غیر جانبدار تحقیقات کی حمایت کرے گا جن میں افغانستان میں موجود دہشتگرد نیٹ ورکس اور ان کی معاونت کو بھی شامل کیا جائے۔
دوسری جانب آزاد جموں و کشمیر میں کالعدم قرار دی گئی جوائنٹ عوامی ایکشن کمیٹی (جے اے اے سی) سے متعلق جاری تجزیے میں کہا گیا ہے کہ اس تنظیم کی سرگرمیاں ابتدا میں عوامی مطالبات تک محدود تھیں، تاہم بعد ازاں بعض احتجاجی مظاہروں کو بیرونی پاکستان مخالف حلقوں کی حمایت، بھارتی سیاسی شخصیات کی پذیرائی اور پاکستان مخالف بیانیے کے فروغ کے لیے استعمال کیا گیا۔
مزید پڑھیں:شمالی وزیرستان: سیکیورٹی فورسز کی کارروائی میں 11 خارجی دہشتگرد ہلاک
اختلاف رائے اور پُرامن احتجاج ہر شہری کا آئینی حق ہے، تاہم تشدد، ریاستی اداروں پر حملے اور قانون نافذ کرنے والے اہلکاروں کو نشانہ بنانا کسی بھی جمہوری جدوجہد کا حصہ نہیں ہو سکتا۔ عوامی مطالبات اور پرامن احتجاج کو ایسے عناصر سے الگ رکھنا ضروری ہے جو تشدد یا بیرونی مفادات کے لیے کسی تحریک کو استعمال کرنے کی کوشش کریں۔
