بھارتی ریاست آندھرا پردیش میں دسویں جماعت کی ایک طالبہ نے مبینہ طور پر خودکشی کر کے زندگی کا خاتمہ کر لیا۔ طالبہ چند روز قبل وزیراعلیٰ این چندرابابو نائیڈو کے ساتھ ایک سرکاری تقریب میں شریک ہوئی تھی، جہاں اس نے تقریب سے خطاب بھی کیا تھا۔
پولیس کے مطابق واقعہ ضلع آلوری سیتا رام راجو کے علاقے رامپاچوداورم منڈل کے گاؤں ایرلا پلی میں پیش آیا، جہاں سرکاری زِلہ پریشد ہائی اسکول رامپاچوداورم کی طالبہ مرم شوانی مردہ پائی گئی۔
پولیس کا کہنا ہے کہ شوانی اپنی دادی کے گھر میں مردہ حالت میں ملی۔ واقعے کے بعد مقدمہ درج کر کے تحقیقات شروع کر دی گئی ہیں۔
وزیراعلیٰ کے ساتھ تقریب میں شرکت کی تھی
رپورٹس کے مطابق واقعے سے صرف 3 روز قبل شوانی نے ریاستی حکومت کی جانب سے منعقدہ میگا پیرنٹ ٹیچر میٹنگ میں شرکت کی تھی، جہاں اس نے وزیراعلیٰ چندرابابو نائیڈو اور وزیر تعلیم نارا لوکیش کی موجودگی میں خطاب کیا تھا۔
طالبہ نے تقریب کے دوران اپنی خواہش کا اظہار کیا تھا کہ وہ ’شائننگ اسٹار‘ ایوارڈ حاصل کرنا چاہتی ہے۔
اس کی تقریر کے بعد وزیراعلیٰ چندرابابو نائیڈو نے اسے اپنے پاس بیٹھنے کے لیے بلایا، اس سے گفتگو کی اور دیگر طلبہ کے ساتھ کھانا بھی کھایا۔
گھر والوں کے نام تحریری نوٹ برآمد
تحقیقاتی حکام کے مطابق پولیس نے جائے وقوعہ سے ایک ہاتھ سے لکھا ہوا نوٹ بھی برآمد کیا ہے، جس میں طالبہ نے اپنے والدین سے معذرت کی اور لکھا کہ وہ ان کے خواب پورے کرنے کے لیے سخت محنت کرنا چاہتی تھی۔
نوٹ میں یہ بھی درج تھا کہ وہ زندگی گزارنا چاہتی تھی، لیکن حالات اس کے لیے مشکل ہو گئے تھے۔ اس نے اپنے اہلِ خانہ سے متحد رہنے کی اپیل بھی کی۔
پولیس کے مطابق تاحال طالبہ کی خودکشی کی وجہ معلوم نہیں ہو سکی اور مختلف پہلوؤں سے تحقیقات جاری ہیں۔
وزیراعلیٰ نے تحقیقات کا حکم دے دیا
وزیراعلیٰ چندرابابو نائیڈو نے طالبہ کی موت پر گہرے دکھ اور افسوس کا اظہار کرتے ہوئے واقعے کی مکمل تحقیقات کا حکم دیا ہے۔
اپنے بیان میں وزیراعلیٰ نے اسکول تقریب کے دوران شوانی کے جوش، صلاحیتوں اور مستقبل کے عزائم کو یاد کرتے ہوئے کہا کہ اس کی موت انتہائی افسوسناک اور دل دہلا دینے والا واقعہ ہے۔
انہوں نے ذہنی دباؤ یا مشکلات کا سامنا کرنے والے طلبہ سے اپیل کی کہ وہ اپنے خاندان، دوستوں اور قریبی افراد سے مدد حاصل کریں، کیونکہ ہر مسئلے کا کوئی نہ کوئی حل موجود ہوتا ہے۔
طالبہ کی موت کے بعد علاقے کے اساتذہ، ہم جماعت طلبہ اور قبائلی علاقے کے رہائشی غمزدہ ہیں، جبکہ پولیس واقعے کے اصل محرکات جاننے کے لیے تحقیقات جاری رکھے ہوئے ہے۔
