وزیراعظم آزاد جموں کشمیر راجا فیصل ممتاز راٹھور نے کہا ہے کہ حالیہ پرتشدد واقعات کسی اچانک پیش آنے والے واقعے کا نتیجہ نہیں بلکہ کئی ہفتوں سے تیار کی گئی ایک منصوبہ بندی تھی، جس کا مقصد بے گناہ کشمیریوں کا خون بہانا تھا۔
سماجی رابطے کی سائٹ ایک پر ایک ویڈیو شیئر کرتے ہوئے انہوں نے لکھا ’مظفرآباد کی جانب مارچ کا اعلان اور اسے انتخابات کے دوران انجام دینا ایک سوچا سمجھا منصوبہ تھا، جس کا مقصد بڑے پیمانے پر بدامنی اور انتشار پیدا کرنا تھا۔‘
They planned this for weeks and now they’ve got what they wanted: blood of innocent Kashmiris.
The rioters not only have sophisticated weapons, they have the advantage of access to all vantage points from where they take aim at security forces whose only objective has been to… pic.twitter.com/SjPYum5aFA
— Faisal Mumtaz Rathore (@PMofAJK) July 28, 2026
وزیراعظم آزاد کشمیر نے کہاکہ ہنگامہ آرائی میں ملوث عناصر نہ صرف جدید ہتھیاروں سے لیس ہیں بلکہ انہیں ایسے بلند مقامات تک بھی رسائی حاصل ہے جہاں سے وہ سیکیورٹی فورسز کو نشانہ بنا رہے ہیں۔
انہوں نے کہاکہ اس تمام صورتحال میں سیکیورٹی فورسز کا واحد مقصد حالات کو قابو میں رکھنا اور مزید کشیدگی کو روکنا ہے۔
’عوام اشتعال انگیز عناصر سے دور رہیں‘
فیصل راٹھور نے عوام سے اپیل کی کہ وہ ایسے اشتعال انگیز عناصر سے دور رہیں، کیونکہ ان کا ماضی اس بات کا گواہ ہے کہ وہ شہریوں کو انسانی ڈھال کے طور پر استعمال کرتے ہیں۔
انہوں نے کہاکہ یہ عناصر جان بوجھ کر ایسے حالات پیدا کرتے ہیں جن میں سیکیورٹی اہلکار اپنی جانوں کے دفاع میں کارروائی پر مجبور ہو جائیں، جس کے بعد وہ اس صورتحال سے اپنے مقاصد کے لیے فائدہ اٹھانے کی کوشش کرتے ہیں۔
وزیراعظم آزاد کشمیر نے شہریوں پر زور دیا کہ وہ امن و امان برقرار رکھنے کے لیے ریاستی اداروں کے ساتھ تعاون کریں اور کسی بھی ایسے اقدام سے گریز کریں جو حالات کو مزید خراب کرنے کا باعث بنے۔
