وفاقی وزیر برائے آئی ٹی و ٹیلی کمیونیکیشن شزا فاطمہ خواجہ نے کہا ہے کہ جدید دور میں مصنوعی ذہانت (اے آئی) کے بغیر کوئی بھی ملک ترقی نہیں کر سکتا، جبکہ قومی ترقی اور خوشحالی کے لیے خواتین کی مؤثر شمولیت ناگزیر ہے۔
اسلام آباد میں ایک تقریب سے خطاب کرتے ہوئے شزا فاطمہ نے کہا کہ ملک میں خواتین موبائل صارفین کی تعداد میں مسلسل اضافہ ہو رہا ہے اور آئی ٹی سیکٹر میں ان کا کردار نہایت اہم ہے۔
انہوں نے بتایا کہ خواتین کو بااختیار بنانے کے لیے ایک کروڑ مفت سمز تقسیم کی جا چکی ہیں۔ حکومت ڈیجیٹل رابطوں اور معلومات تک رسائی کو مزید آسان بنا رہی ہے۔
وفاقی وزیر نے کہا کہ تعلیم کے ذرائع بدل چکے ہیں اور اب تعلیم صرف اسکول، اساتذہ اور والدین تک محدود نہیں رہی، جبکہ آئندہ نسلیں معلومات مختلف انداز میں حاصل کریں گی۔
مزید پڑھیں:ڈیجیٹل معیشت کے فروغ کے لیے ٹیلی کمیونیکیشن قوانین میں اصلاحات ضروری، شزا فاطمہ
شزا فاطمہ نے کہا کہ نوجوانوں کو عالمی مارکیٹ کے تقاضوں کے مطابق تیار کرنا ہوگا کیونکہ مستقبل میں وہی افراد بہتر روزگار حاصل کریں گے جو جدید ٹیکنالوجی اور مصنوعی ذہانت کا مؤثر استعمال جانتے ہوں۔
انہوں نے اس بات پر زور دیا کہ بدلتے ہوئے دور کے تقاضوں کے مطابق خود کو، اپنے خاندان اور پاکستان کو جدید ٹیکنالوجی سے ہم آہنگ کرنا وقت کی اہم ضرورت ہے۔
