پاکستانی اداکارہ عروبہ مرزا نے پنجاب اسمبلی کے رکن ثاقب چدھڑ پر ہراسانی کا الزام عائد کرتے ہوئے مبینہ پیغامات کے اسکرین شاٹس سوشل میڈیا پر شیئر کردیے ہیں۔
یہ بھی پڑھیں: مومنہ اقبال کیس میں پیشرفت، تفتیش مکمل، ثاقب چدھڑ کے خلاف رپورٹ عدالت میں پیش
عروبہ مرزا نے اپنے انسٹاگرام اسٹوریز میں کچھ اسکرین شاٹس جاری کیے، جن کے بارے میں ان کا دعویٰ ہے کہ یہ ثاقب چدھڑ کی جانب سے بھیجے گئے پیغامات ہیں۔ مبینہ پیغامات میں انہیں بار بار رابطہ کرنے اور گفتگو جاری رکھنے کے لیے اسنیپ چیٹ پر آنے کا کہا گیا۔
اداکارہ نے اسکرین شاٹس کے ساتھ لکھا کہ ’مومنہ اقبال اور طوبیٰ انور کے بعد اب میری باری ہے۔‘
View this post on Instagram
عروبہ مرزا کا الزام سامنے آنے کے بعد یہ معاملہ مزید توجہ حاصل کر گیا ہے، کیونکہ اس سے قبل اداکاراؤں مومنہ اقبال اور طوبیٰ انور بھی ثاقب چدھڑ پر الزامات عائد کرچکی ہیں۔
اس سے قبل اداکارہ مومنہ اقبال کی درخواست پر ثاقب چدھڑ کے خلاف الیکٹرانک جرائم کی روک تھام کے قانون کے تحت مقدمہ درج کیا گیا تھا، جس کی تحقیقات قومی سائبر کرائم انویسٹی گیشن ایجنسی کررہی ہے۔
مومنہ اقبال نے الزام عائد کیا تھا کہ انہیں طویل عرصے تک آن لائن ہراسانی، سائبر بُلنگ، ذہنی دباؤ اور دھمکیوں کا سامنا رہا۔
دوسری جانب اداکارہ طوبیٰ انور نے بھی حال ہی میں الزام لگایا تھا کہ ثاقب چدھڑ نے انہیں تحفے میں آئی فون دینے کی پیشکش کی تھی۔
ثاقب چدھڑ کی جانب سے عروبہ مرزا کے تازہ الزامات پر تاحال کوئی ردعمل سامنے نہیں آیا۔
