معروف مصنف اور ڈرامہ نگار خلیل الرحمان قمر نے اداکارہ مومنہ اقبال اور ثاقب چدھڑ کے مبینہ ماضی کے تعلق سے متعلق جاری بحث پر گفتگو کی ہے۔
یہ معاملہ اس وقت سوشل میڈیا پر زیرِ بحث آیا جب مومنہ اقبال کے نکاح سے قبل ان کے سابق مبینہ ساتھی ثاقب چدھڑ کی جانب سے انہیں فون پر دھمکیاں دینے کے الزامات سامنے آئے، جس کے بعد یہ موضوع عوامی توجہ کا مرکز بن گیا۔
حال ہی میں ریحان طارق کے پوڈکاسٹ میں گفتگو کرتے ہوئے خلیل الرحمان قمر نے معاشرے میں بڑھتے ہوئے غیر ازدواجی تعلقات اور لِو اِن ریلیشن شپ کے رجحان پر تشویش کا اظہار کیا۔
ان کا کہنا تھا کہ اس پورے معاملے میں سب سے بڑی بات جو ہم نے نظر انداز کر دی ہے وہ یہ ہے کہ ہمیں لِو اِن ریلیشن شپ کی قبولیت سکھائی جا رہی ہے۔ کوئی یہ نہیں سوچ رہا کہ اس سے معاشرے کو خاموشی سے کتنا نقصان پہنچ رہا ہے۔ اگر یہ ایک نارمل چیز بن گئی ہے اور اسے قبول کیا جا رہا ہے تو پھر پاکستان کے ساتھ ‘اسلامی’ کا لفظ ہی ہٹا دینا چاہیے۔
انہوں نے کہا کہ اب لِو اِن ریلیشن شپ کے بہت سے جواز پیش کیے جا رہے ہیں۔ ایسا نہ کریں، خدا کے لیے اسے نارمل اور مقبول نہ بنائیں۔ ہمارے کسی بھی مذہبی عالم نے اس کی حوصلہ افزائی نہیں کی۔ اس کا بنیادی مقصد نکاح کے ادارے کو کمزور کرنا ہے۔
یہ بھی پڑھیں: ثاقب چدھڑ پر سنگین الزامات عائد کرنے والی اداکارہ مومنہ اقبال نے نکاح کرلیا
انہوں نے مزید کہا کہ آخر یہ مرد اتنے پیسے کہاں سے لاتے ہیں؟ لڑکیوں کے لیے بھی یہ آسان پیسہ بن جاتا ہے۔ یہ نہیں بدلیں گے کیونکہ یہ سب پیسے کا کھیل ہے۔ اگر یہ رشتہ ہے تو اس میں جذبات ہوتے ہیں اور اگر یہ بزنس ہے تو پھر اسے کھل کر طے کرنا چاہیے۔
خلیل الرحمان قمر نے یہ بھی کہا کہ مسٹر چدھڑ کو بھی شرم آنی چاہیے۔ اس کیس میں دونوں برابر کے ذمہ دار ہیں۔ اگر یہ رشتہ تھا تو اسے عزت سے ختم کرنا چاہیے تھا اور اگر یہ سرمایہ کاری تھی تو اسے نجی طور پر حل کرنا چاہیے تھا۔ یہ سب عوامی سطح پر بات کرنے والی بچکانہ حرکتیں ہیں۔ دونوں کی رضامندی موجود تھی اور دونوں کی طرف سے معاملہ واضح تھا۔
یہ بھی پڑھیں: مومنہ اقبال ہراسانی کیس میں اہم پیش رفت، نکاح کی تاریخ سامنے آگئی، بہن کے چونکا دینے والے انکشافات
انہوں نے مزید کہا ہمیں غلط طریقے سے گمراہ کیا جا رہا ہے۔ اس میں دونوں برابر کے ذمہ دار ہیں۔ سادہ سی بات ہے کہ جب ازدواجی تعلق سے باہر کوئی تعلق ہوتا ہے تو اس میں مرد اور عورت دونوں شامل ہوتے ہیں۔ عورت اکیلی ایسے تعلق میں شامل نہیں ہوتی۔
