اسلام آباد پولیس نے ’نشہ اب نہیں‘ مہم کے تحت کارروائی کرتے ہوئے شراب فروشی میں ملوث ایک ملزم کو گرفتار کر کے اس کے قبضے سے 840 بوتل شراب برآمد کر لی۔
ترجمان اسلام آباد پولیس کے مطابق تھانہ لوہی بھیر پولیس نے خفیہ اطلاع پر کارروائی کے دوران ملزم فیضان سکندر کو گرفتار کیا۔ ملزم کے خلاف مقدمہ درج کر کے مزید تفتیش شروع کر دی گئی ہے تاکہ اس کے نیٹ ورک اور دیگر سہولت کاروں کا سراغ لگایا جا سکے۔
ترجمان کے مطابق انسپکٹر جنرل اسلام آباد پولیس کے احکامات پر ’نشہ اب نہیں‘ مہم کے تحت منشیات اور دیگر ممنوعہ اشیا کی خرید و فروخت میں ملوث عناصر کے خلاف مؤثر کریک ڈاؤن جاری ہے۔
ایس ایس پی آپریشنز اسلام آباد قاضی علی رضا نے کامیاب کارروائی پر ایس پی سواں زون محمد خرم اشرف اور ان کی ٹیم کو شاباش دیتے ہوئے ان کی کارکردگی کو سراہا۔
انہوں نے کہا کہ اسلام آباد پولیس منشیات فروشوں اور معاشرے میں نشے کے کاروبار کو فروغ دینے والے عناصر کے خلاف زیرو ٹالرنس پالیسی پر عمل پیرا ہے اور ایسے عناصر کے خلاف بلاامتیاز کارروائیاں آئندہ بھی جاری رہیں گی۔
