اسلام آباد ہائی کورٹ نے سابق چیف جسٹس ثاقب نثار کے بیٹے نجم الثاقب کی آڈیو لیک پر خصوصی کمیٹی میں طلبی کے خلاف حکمِ امتناع میں 16 اگست تک توسیع کر دی۔
اسلام آباد کے جسٹس بابر ستار نے گزشتہ سماعت پر بیرسٹر اعتزاز احسن، رضا ربانی، مخدوم علی خان اور بیرسٹر محسن شاہنواز رانجھا کو عدالتی معاونین مقرر کرتے ہوئے نجم الثاقب کی آڈیو لیک پر پارلیمانی کمیٹی میں طلبی کیخلاف حکم امتناع دیا تھا۔
آج درخواست گزار نجم الثاقب کے وکیل سردار لطیف کھوسہ سمیت عدالتی معاون اعتزاز احسن عدالت میں پیش ہوئے۔
دورانِ سماعت نجم الثاقب کے وکیل لطیف کھوسہ کا موقف تھا کہ زیر سماعت معاملہ پاکستان کے 25 کروڑ عوام کے بنیادی حقوق سے متعلق ہے۔ حکومت چیف جسٹس کی مشاورت کے بغیر جوڈیشل کمیشن کیسے بنا سکتی ہے؟ حکومت چیف جسٹس سے مشاورت کرتی اور وہ ججز نامزد کرتے۔
عدالت نے اٹارنی جنرل سے استفسار کیا کہ آپ کو عدالتی سوالات کے جواب دینے میں کتنا وقت درکار ہو گا۔ اٹارنی جنرل منصور عثمان اعوان نے عدالت سے استدعا کی کہ یہ معاملہ سپریم کورٹ میں بھی زیرِ سماعت ہے، لہذا زیرِ بحث سوالات پر سپریم کورٹ کے فیصلے کا انتظار کر لیا جائے۔
جسٹس بابرستار نے اٹارنی جنرل کو 4 ہفتے کی مہلت دیتے ہوئے کہا کہ عدالت کی چند بنیادی نوعیت کے سوالات پر ہی معاونت کردیں۔ معاملہ بعد میں سپریم کورٹ ہی جانا ہے لہذا ہائیکورٹ کے کسی ممکنہ فیصلہ سے سپریم کورٹ کی معاونت کی جاسکتی ہے۔
عدالتِ عالیہ نے سابق چیف جسٹس کے بیٹے کی خصوصی کمیٹی میں طلبی کے خلاف حکمِ امتناع میں توسیع کرتے ہوئے سماعت 16 اگست تک ملتوی کر دی۔
واضح رہے کہ گزشتہ سماعت کے دوران جسٹس بابر ستار نے عدالت نے آڈیو ریکارڈنگ کے معاملے پر عدالتی معاونین کو نامزد کرتے ہوئے مندرجہ ذیل سوالات اٹھائے تھے۔
کیا آئین اور قانون شہریوں کی کالز کی سرویلنس اور ریکارڈنگ کی اجازت دیتا ہے؟ غیر قانونی طور پر ریکارڈ کی گئی کالز کی ذمے داری کس پر عائد ہو گی؟ کون سی اتھارٹی یا ایجنسی کس میکنزم کے تحت کالز ریکارڈ کر سکتی ہے؟ آڈیو ریکارڈنگ کا غلط استعمال روکنے کے کیا سیف گارڈز ہیں؟
