جشنِ آزادی پاکستان کے سلسلے میں مظفرآباد میں تیاریاں عروج پر پہنچ گئی ہیں، شہر کے مختلف علاقوں کو سبز ہلالی پرچموں، جھنڈیوں اور قومی رنگوں سے سجا دیا گیا ہے، جبکہ شہریوں بالخصوص بچوں اور نوجوانوں میں یومِ آزادی کے حوالے سے بھرپور جوش و خروش پایا جاتا ہے۔
14 اگست کی مناسبت سے شہر کے مختلف مقامات پر خصوصی اسٹالز سج گئے ہیں جہاں سبز ہلالی پرچم، بیجز، جھنڈیاں اور قومی ملبوسات دستیاب ہیں۔ بچے اور نوجوان بڑی تعداد میں ان اسٹالز کا رخ کرکے جشنِ آزادی کی تیاریوں کے لیے خریداری کر رہے ہیں۔
شہریوں کا کہنا ہے کہ 14 اگست محض جشن منانے کا دن نہیں بلکہ پاکستان سے محبت، قومی یکجہتی اور وطن کے ساتھ تجدیدِ عہد کا موقع بھی ہے۔
