کراچی کے علاقے کلفٹن میں سی ویو اپارٹمنٹس کے ایک گیراج میں کھڑی گاڑی سے 2 افراد کی لاشیں برآمد ہوئی ہیں، پولیس نے ابتدائی طور پر دونوں کی موت دم گھٹنے سے ہونے کا شبہ ظاہر کیا ہے۔
پولیس کے مطابق سی ویو اپارٹمنٹس میں گیراج سے بدبو آنے پر رہائشیوں نے پولیس کو اطلاع دی، جس کے بعد گاڑی سے 2 افراد کی لاشیں برآمد ہوئیں۔
یہ بھی پڑھیں: کراچی کلفٹن سے نوجوان مرد اور خاتون کی لاشیں برآمد
درخشاں تھانے کے ایس ایچ او راشد علی نے بتایا کہ ایک متوفی کی شناخت 34 سالہ اسداللہ کے نام سے ہوئی ہے جو کیماڑی کے علاقے گلشن سکندرآباد، شیرین جناح کالونی کا رہائشی تھا اور اپارٹمنٹس میں مقیم ایک بزرگ شہری کے ڈرائیور کے طور پر کام کرتا تھا۔
پولیس کے مطابق دوسرے شخص کی عمر 20 سے 22 سال کے درمیان معلوم ہوتی ہے تاہم فوری طور پر اس کی شناخت نہیں ہوسکی۔
پولیس نے بتایا کہ اسداللہ کی لاش ڈرائیونگ سیٹ جبکہ دوسرے شخص کی لاش گاڑی کی پچھلی نشست سے ملی۔
پولیس کے مطابق دونوں افراد کو نیم برہنہ حالت میں پایا گیا، جبکہ ابتدائی معلومات کے مطابق دونوں کی موت کو 1 سے 2 روز گزر چکے تھے۔
یہ بھی پڑھیں:صوابی میں مکان سے باپ سمیت 4 بچوں کی لاشیں برآمد
واقعے کی اطلاع ملنے کے بعد پولیس نے جائے وقوعہ پر کرائم سین یونٹ کو طلب کیا، جس نے گاڑی اور جائے وقوعہ سے شواہد اکٹھے کیے۔
بعد ازاں گاڑی کو گیراج سے منتقل کردیا گیا جبکہ دونوں لاشیں طبی و قانونی کارروائی اور پوسٹ مارٹم کے لیے جناح اسپتال منتقل کردی گئیں۔
ایس ایچ او راشد علی کے مطابق ابتدائی تفتیش میں بظاہر موت کی وجہ دم گھٹنا معلوم ہوتی ہے تاہم حتمی وجہ موت پوسٹ مارٹم رپورٹ آنے کے بعد ہی سامنے آئے گی۔
پولیس نے گاڑی اور جائے وقوعہ سے شواہد جمع کرکے واقعے کے مختلف پہلوؤں سے تحقیقات شروع کردی ہیں۔
یہ بھی پڑھیں: کراچی: فلیٹ سے 4 خواتین کی تشدد زدہ اور گلا کٹی لاشیں برآمد
واضح رہے کہ گزشتہ سال بھی اسی اپارٹمنٹس میں پارک کی گئی ایک گاڑی سے ایک مرد اور ایک خاتون کی لاشیں برآمد ہوئی تھیں۔
پولیس کے مطابق اس وقت سی ویو اپارٹمنٹس کے بلاک 28 کے پارکنگ ایریا میں کھڑی سفید پراڈو سے لاشیں برآمد ہوئی تھیں، جن میں مرد کی شناخت ریٹائرڈ فوجی افسر شہباز ملک کے نام سے ہوئی تھی۔
