وفاقی حکومت نادرا رجسٹریشن سینٹرز پر ہی پاسپورٹ کی درخواستیں اور پروسیسنگ کی سہولیات فراہم کرنے کی تجویز پر عملدرآمد کے لیے متحرک ہو گئی ہے تاکہ شہریوں کو شناختی کارڈ اور پاسپورٹ دونوں سروسز ایک ہی چھت تلے میسر آ سکیں۔
یہ بھی پڑھیں: پینشنرز کے لیے پروف آف لائف سرٹیفکیٹ مفت، نادرا نے سہولت کے مراکز بھی بڑھا دیے
اس سلسلے میں ڈائریکٹر جنرل امیگریشن اینڈ پاسپورٹس محمد علی رندھاوا نے نادرا ہیڈکوارٹرز کا دورہ کیا جہاں انہوں نے چیئرمین نادرا لیفٹیننٹ جنرل محمد منیر افسر سے اہم ملاقات کی۔
نادرا کے منتخب رجسٹریشن سینٹرز پر پاسپورٹ پروسیسنگ کے جدید ماڈیولز کی تنصیب پر غور کیا گیا تاکہ ایک ہی جگہ دونوں محکموں کی خدمات دی جا سکیں۔
پاک آئی ڈی موبائل ایپ: نادرا کی مشہور پاک آئی ڈی موبائل ایپلیکیشن میں پاسپورٹ سے متعلق خدمات کی شمولیت کے طریقہ کار پر بریفنگ دی گئی۔
جدید ٹیکنالوجی اور اصلاحات: دونوں اداروں نے سروس ڈیلیوری کو مزید تیز، شفاف اور آسان بنانے کے لیے جدید ڈیجیٹل نظام، پالیسی اصلاحات اور ڈیٹا شیئرنگ کے باہمی فریم ورک پر اتفاق کیا۔
مزید پڑھیے: نادرا کا چِپ کے بغیر نیا شناختی کارڈ متعارف، کیا پرانے کارڈ ختم ہوجائیں گے؟
ڈی جی امیگریشن اینڈ پاسپورٹس کا کہنا تھا کہ جدید ترین ٹیکنالوجی کے استعمال اور اداروں کے باہمی تعاون کے ذریعے شہریوں کو عالمی معیار کی سہولیات کی فراہمی حکومت کی ترجیحات میں شامل ہے۔
