لاہور میں طویل دھرنے کا عندیہ، ’اٹھانے کی کوشش کی تو اپنا شوق پورا کرلیں‘، حافظ نعیم

 امیر جماعت اسلامی حافظ نعیم الرحمان نے کہا ہے کہ پیٹرولیم لیوی کی صورت میں غریب عوام سے بھتا ٹیکس وصول کیا جا رہا ہے، عالمی منڈی میں قیمتوں میں کمی کے باوجود پاکستان میں پیٹرول سستا نہیں کیا جا رہا۔

میڈیا رپورٹ کے مطابق لاہور میں پریس کانفرنس کرتے ہوئے حافظ نعیم الرحمان نے کہا کہ دھرنوں اور احتجاج کی صورت میں ملک بھر میں ایک تاریخی جدوجہد شروع ہوچکی ہے، سیکڑوں مقامات پر ہونے والے احتجاج سے عوام میں شعور اور بیداری پیدا ہورہی ہے۔

انہوں نے کہا کہ موجودہ حکومت عوام کی نمائندہ حکومت نہیں بلکہ فارم 47 کی حکومت ہے۔ عالمی مارکیٹ میں پیٹرولیم مصنوعات کی قیمتوں میں فرق آنے کے باوجود عوام کو اس کا فائدہ نہیں دیا جا رہا اور پیٹرولیم لیوی کے ذریعے غریبوں سے بھتا ٹیکس وصول کیا جا رہا ہے۔

یہ بھی پڑھیں:جماعت اسلامی گرینڈ اپوزیشن اتحاد کا حصہ نہیں بنے گی، حافظ نعیم الرحمان کا صاف انکار

حافظ نعیم الرحمان کا کہنا تھا کہ وفاقی حکومت کے اپنے اخراجات ایک ٹریلین روپے تک پہنچ چکے ہیں، جبکہ دوسری جانب ملک میں لوڈشیڈنگ عروج پر ہے۔ انہوں نے مطالبہ کیا کہ سرکاری گاڑیوں کا حجم بھی 1300 سی سی سے زیادہ نہیں ہونا چاہیے۔

امیر جماعت اسلامی نے لاہور میں طویل دھرنا دینے کا عندیہ دیتے ہوئے کہا کہ جماعت اسلامی عوام کے حقوق کے لیے اپنا احتجاج جاری رکھے گی۔ انہوں نے تمام سیاسی جماعتوں کو بھی دھرنے میں شرکت کی دعوت دی۔

انہوں نے خبردار کیا کہ اگر کسی نے جماعت اسلامی کے کارکنوں کو دھرنے سے اٹھانے کی کوشش کی تو ’’اپنا شوق پورا کرلے‘‘۔

واضح رہے کہ جماعت اسلامی کی جانب سے پیٹرولیم لیوی کے خلاف کراچی، لاہور اور ملک کے دیگر شہروں میں احتجاجی دھرنے دیے جا رہے ہیں۔