شہری کو دفتر میں حبس بے جا میں رکھنے اور دیگر غیر قانونی اقدامات کے الزامات پر اسلام آباد ہائیکورٹ نے دو پولیس اہلکاروں سمیت ڈپٹی کمشنر اسلام آباد اور ایڈیشنل ڈپٹی کمشنر کے خلاف مقدمہ درج کرنے کا حکم دیا ہے۔
اسلام آباد ہائیکورٹ کے جسٹس بابر ستار نے شہری شیرزادہ کی درخواست پر دارالحکومت کے تھانہ گولڑہ میں تعینات سب انسپکٹر امتیاز اور کانسٹیبل نادر کے خلاف بھی مقدمہ درج کرنے کے احکامات جاری کیے ہیں۔
درخواست گزار شہری نمائندگی کرتے ہوئے وکیل عثمان وڑائچ اور بابر حیات سمور نے موقف اختیار کیا کہ ان کے موکل کو ڈپٹی کمشنر آفس بلا کر 4 گھنٹے حبس بے جا میں رکھا گیا۔ موبائل چھین لیا گیا اور ان کی چیک بک گھر سے منگوائی گئی۔
’حبس بے جا میں زبردستی غیر قانونی طور پر 5 کروڑ کا چیک لے کر کیش کرایا گیا۔ جعلی ڈیڈ بنوا کر دستخط کرائے، زبردستی 2 پولیس اہلکار گواہ بھی بنائے گئے۔ بائیس اے کے آرڈر میں عدالت نے لکھا ہے کہ پولیس کا کنڈکٹ درست نہیں۔‘
درخواست گزار شہری کی جانب سے ڈپٹی کمشنر عرفان نواز میمن، ایڈیشنل ڈپٹی کمشنر اور متعلقہ پولیس اہلکاروں کے خلاف مقدمہ درج کرنے کی استدعا منظور کرتے ہوئے عدالت نے ڈپٹی کمشنر کو تنبیہ کی کہ وہ اپنے کام سے کام رکھیں عدالت نہ بنیں۔
جسٹس بابر ستار نے پولیس حکام سے استفسار کرتے ہوئے ریمارکس دیے کہ ڈپٹی کمشنر کیسے اپنے دفتر میں کسی کو حبس بے جا میں رکھ سکتا ہے، دو پرائیویٹ شہریوں کے تنازع میں ڈپٹی کمشنر کیسے عدالت لگا سکتا ہے، ڈی سی کے خلاف درخواست کی تحقیقات کون کرے گا؟
درخواست گزار شہری کی جانب سے حبس بے جا میں رکھنے اور اغوا برائے تاوان کا مقدمہ درج کرنے کی درخواست منظور کرتے ہوئے عدالت نے پولیس کو شہری کی درخواست کے مطابق ڈپٹی کمشنر اسلام آباد عرفان نواز میمن، ایڈیشنل ڈپٹی کمشنر اور دو پولیس اہلکاروں کیخلاف مقدمہ درج کرنے کا حکم دیدیا۔
