اوپن اے آئی نے جنوبی کوریا کی ٹیکنالوجی کمپنی سام سنگ کے ساتھ چپ سازی، میموری ٹیکنالوجی اور کاروباری سافٹ ویئر کے شعبوں میں تعاون مزید بڑھانے کی تصدیق کر دی ہے، جبکہ کوریا میں چیٹ جی پی ٹی کے استعمال میں بھی نمایاں اضافہ ہوا ہے۔
اوپن اے آئی کوریا کے جنرل منیجر ہیریسن کم نے سیئول میں صحافیوں سے گفتگو کرتے ہوئے کہا کہ سام سنگ الیکٹرانکس کے ساتھ مستقبل کی چپس کی تیاری اور تحقیق کے حوالے سے سب سے زیادہ پیشرفت ہوئی ہے۔ اس تعاون کے تحت اوپن اے آئی صرف سام سنگ سے چپس خریدنے والی کمپنی نہیں رہے گی بلکہ اپنی مصنوعات میں استعمال ہونے والے جدید پروسیسرز کی تیاری میں بھی شریک ہوگی۔
یہ بھی پڑھیے اوپن اے آئی نے امریکی حکومت کو 5فیصد شراکت کی تجویز کیوں دی؟
رپورٹس کے مطابق مستقبل کی چپ ’جالاپینو‘ پروسیسر کا جدید ورژن ہو سکتی ہے، جسے اوپن اے آئی نے براڈ کام کے تعاون سے تیار کیا اور رواں سال ٹی ایس ایم سی سے تیار کروایا تھا۔ ٹی ایس ایم سی سے سام سنگ کی جانب منتقلی اوپن اے آئی کے لیے چپ سازی کے عمل کو تائیوان سے باہر متنوع بنانے کی اہم پیشرفت ہوگی، کیونکہ مصنوعی ذہانت کی کمپنیاں سپلائی چین کو کسی ایک خطے پر زیادہ انحصار سے محفوظ بنانے کی کوشش کر رہی ہیں۔
پروسیسرز کے علاوہ اوپن اے آئی اپنے ’اسٹارگیٹ‘ ڈیٹا سینٹر منصوبے کے لیے میموری چپس کی بڑھتی ہوئی ضرورت پوری کرنے میں بھی سام سنگ پر انحصار کر رہا ہے۔ سام سنگ اور اس کی حریف کمپنی ایس کے ہائنکس نے گزشتہ سال اسٹارگیٹ کے لیے میموری چپس فراہم کرنے کے ارادے کی دستاویزات پر دستخط کیے تھے۔ اوپن اے آئی کے مطابق ماڈلز کی پیچیدگی بڑھنے کے ساتھ تیز رفتار اور جدید میموری کی طلب میں بھی مسلسل اضافہ ہوگا۔
جنوبی کوریا اس وقت امریکا کے بعد چیٹ جی پی ٹی کے ادائیگی کرنے والے صارفین کی سب سے بڑی کمیونٹی رکھتا ہے، جبکہ وہاں چیٹ جی پی ٹی انٹرپرائز کے استعمال میں صرف ایک سال کے دوران تقریباً 28 گنا اضافہ ہوا ہے۔ قانونی، مالیاتی، مارکیٹنگ اور انتظامی شعبوں میں اس کا استعمال بڑھ رہا ہے۔ سام سنگ کا ڈیوائس ایکسپیرینس شعبہ بھی اندرونی طور پر چیٹ جی پی ٹی کے ساتھ گوگل جیمنی اور اینتھروپک کے کلاڈ کو استعمال کر رہا ہے۔ اوپن اے آئی کے مطابق 4 ستمبر کو جی پی ٹی-6 آسٹرا کے اجرا کے بعد صارفین کی تعداد مزید بڑھنے کی توقع ہے۔
