اورنگی ٹاؤن میں سرکاری اسکول کی خستہ حال دیوار گرنے سے ملبے تلے دب کر 5 افراد جاں بحق جبکہ 2 شدید زخمی ہوگئے، پولیس نے واقعے کی ممکنہ وجہ بتادی۔
پولیس کے مطابق واقعہ مومن آباد تھانے کی حدود میں اورنگی ٹاؤن سیکٹر 11، بلاک ایل میں فٹبال چورنگی کے قریب پیش آیا، جہاں کے ایم سی گرلز، بوائز پرائمری و سیکنڈری اسکول کی بوسیدہ دیوار اچانک گر گئی۔
پولیس کا کہنا ہے کہ دیوار گرنے کے وقت 7 افراد اس کے قریب موجود تھے جو ملبے تلے دب گئے۔ اطلاع ملنے پر امدادی اداروں نے فوری کارروائی شروع کی اور ملبے سے لاشوں اور زخمیوں کو نکال کر اسپتال منتقل کیا۔
یہ بھی پڑھیں:ترکی میں زلزلہ، جیل کی دیواریں منہدم ہونے پر داعش کے 20 قیدی فرار
ایس ایس پی ویسٹ کے مطابق ابتدائی معلومات میں یہ بات سامنے آئی ہے کہ کچھ نشئی افراد مبینہ طور پر دیوار سے سریا نکالنے کی کوشش کر رہے تھے، جس کے دوران خستہ حال دیوار منہدم ہوگئی۔ پولیس واقعے کے دیگر پہلوؤں کی بھی تحقیقات کر رہی ہے۔
ریسکیو حکام کے مطابق جاں بحق افراد کی لاشیں عباسی شہید اسپتال منتقل کی گئیں جبکہ زخمیوں کو بھی طبی امداد کے لیے اسپتال پہنچایا گیا۔
واقعے کے بعد علاقے میں تشویش پائی جاتی ہے، جبکہ شہریوں نے خستہ حال سرکاری عمارتوں اور ان کی بوسیدہ دیواروں کا فوری معائنہ اور خطرناک مقامات کی مرمت کا مطالبہ کیا ہے تاکہ ایسے حادثات دوبارہ پیش نہ آئیں۔
