گلگت بلتستان کے بلند ترین اور معروف سیاحتی مقام خنجراب بارڈر پر سال کی پہلی برفباری نے علاقے کے قدرتی حسن کو چار چاند لگا دیے، برفباری کے بعد بلند و بالا پہاڑوں نے سفید چادر اوڑھ لی جبکہ سرد موسم اور دلکش مناظر نے سیاحوں کو اپنی جانب متوجہ کرلیا۔
خنجراب بارڈر اور اس کے اطراف میں ہونے والی برفباری کے بعد ہر طرف برف کی سفید تہہ دکھائی دینے لگی، جس سے علاقے کا منظر انتہائی دلکش ہوگیا۔ برف سے ڈھکے پہاڑ، سرد ہوائیں اور خوبصورت قدرتی نظارے سیاحوں کے لیے خصوصی توجہ کا مرکز بن گئے۔
خنجراب بارڈر گلگت بلتستان پر پہلی برفباری
خنجراب بارڈر پر سال کی پہلی برفباری، پہاڑ سفید چادر میں ڈھک گئے۔ ❄️پاکستانی اور چینی سیاحوں نے خوبصورت مناظر سے لطف اٹھایا اور یادگار لمحات کیمرے میں محفوظ کیے۔
رپورٹ: احمداللہ pic.twitter.com/WNTBmtQUUr
— Gilgit Baltistan Tourism. (@GBTourism_) September 14, 2026
خنجراب کا دورہ کرنے والے پاکستانی اور چینی سیاحوں نے سال کی پہلی برفباری کا بھرپور لطف اٹھایا۔ سیاحوں نے برف سے ڈھکے پہاڑوں اور حسین مناظر کے ساتھ تصاویر اور ویڈیوز بنائیں اور یادگار لمحات کو کیمروں میں محفوظ کیا۔
برفباری کے باعث خنجراب بارڈر کے قدرتی مناظر مزید دلکش ہوگئے ہیں، جبکہ سوشل میڈیا پر بھی برف سے ڈھکے علاقے کی تصاویر اور ویڈیوز تیزی سے شیئر کی جا رہی ہیں۔ صارفین کی جانب سے خنجراب کے خوبصورت مناظر کو بے حد سراہا جا رہا ہے۔
خنجراب پاس پاکستان اور چین کے درمیان اہم زمینی گزرگاہ ہونے کے ساتھ ساتھ گلگت بلتستان کا ایک معروف سیاحتی مقام بھی ہے۔ سطح سمندر سے انتہائی بلند ہونے کے باعث یہاں موسم سرد رہتا ہے اور برفباری کے دوران پورا علاقہ ایک خوبصورت برفانی منظر میں تبدیل ہوجاتا ہے۔
سال کی پہلی برفباری نے خنجراب بارڈر کی خوبصورتی میں مزید اضافہ کردیا ہے اور برف سے ڈھکے پہاڑوں کے حسین مناظر نے ایک بار پھر اس خطے کی قدرتی دلکشی کو نمایاں کردیا۔
