پاکستان تحریک انصاف کے رہنما شوکت یوسفزئی نے موجودہ حالات کے تناظر میں اسلام آباد کی جانب احتجاج اور لانگ مارچ کا فیصلہ فوری طور پر مؤخر کرنے کی اپیل کردی۔
شوکت یوسفزئی نے پی ٹی آئی چیئرمین بیرسٹر گوہر، سلمان اکرم راجہ، وزیراعلیٰ خیبرپختونخوا اور دیگر پارٹی قائدین کے نام خط میں کہا ہے کہ موجودہ حالات میں اسلام آباد کی جانب احتجاج پارٹی کے لیے درست نہیں ہوگا۔
یہ بھی پڑھیں: عمران خان نے مذاکرات سے منع نہیں کیا، حکومت سنجیدہ نہیں، شوکت یوسفزئی
انہوں نے کہا کہ کارکنوں کے خلاف کریک ڈاؤن اور جانی نقصان سے بچنے کے لیے احتجاج کو موخر کیا جائے، جبکہ پارٹی کو مشاورت اور مذاکرات کا راستہ اپنانا چاہیے۔
شوکت یوسفزئی نے اپنے خط میں کہا کہ عمران خان کی رہائی سمیت پارٹی کے تمام مطالبات درست ہیں، تاہم احتجاج کے نتیجے میں پارٹی پر پابندی عائد ہونے کا خدشہ ہے، اس لیے موجودہ صورتحال میں حکمت عملی پر نظرثانی ضروری ہے۔
پاکستان تحریک انصاف کے صوبائی سیکرٹری اطلاعات شوکت یوسفزئی نے پارٹی قیادت کو لانگ مارچ ملتوی کرنے کا مشورہ دے دیا
موجودہ حالات میں تحریک انصاف کو لانگ مارچ فوری طور پر ملتوی کرنا چاہیے، بیرسٹر گوہر کے نام خط pic.twitter.com/NuQ4G0GQPK
— ahtasham bashir (@myahtasham) September 29, 2026
انہوں نے کہا کہ مئی 2022 کے احتجاج کے دوران خود عمران خان نے بھی اسلام آباد میں مارچ ملتوی کیا تھا۔
شوکت یوسفزئی نے صلح حدیبیہ کا حوالہ دیتے ہوئے کہا کہ حضرت محمد ﷺ نے اس موقع پر نرم موقف اختیار کیا تھا۔
مزید پڑھیں: پی ٹی آئی رہنما شوکت یوسفزئی اپنے 14 بچوں میں سے ایک کا نام بھول گئے، دلچسپ ویڈیو وائرل
پی ٹی آئی رہنما نے کہا کہ انہیں معلوم ہے کہ سوشل میڈیا پر ان کے موقف پر شدید تنقید ہوگی، تاہم ان کے بقول یہ پارٹی صرف سوشل میڈیا کی نہیں بلکہ ہر شہری کی ہے اور قیادت کو وسیع تر مفاد کو مدنظر رکھنا چاہیے۔
شوکت یوسفزئی نے خط میں یہ بھی واضح کیا کہ اگر پارٹی قیادت ان کی رائے مسترد کرتے ہوئے احتجاج کا فیصلہ برقرار رکھتی ہے تو وہ احتجاج میں شرکت کے لیے بھی حاضر ہوں گے۔
