سوشل میڈیا کمپنی ’میٹا‘ نے اعلان کیا ہے کہ کینیڈین پارلیمنٹ کی جانب سے ایک متنازعہ آن لائن نیوز بل کی منظوری کے بعد وہ اپنے پلیٹ فارمز پر کینیڈا کے صارفین کی خبروں کو محدود کرنا شروع کر دے گی۔
کینیڈین پارلیمنٹ کی جانب سے منظور کیا گیا بل بڑے پلیٹ فارمز جن میں گوگل بھی شامل ہے پر پاپندی عائد کرتا ہے کہ وہ ان نیوز پبلشرز کو سماجی رابطے کی ویب سائٹس پر خبریں پوسٹ کرنے سے روکیں جن کو وہ ادائیگی نہیں کر سکتے۔
سوشل میڈیا کمپنی ’میٹا‘ اور ’گوگل‘ دونوں پہلے ہی کچھ کینیڈین صارفین کی خبروں تک رسائی کو محدود کرنے پر کام کر رہے تھے۔
واضخ رہے کہ 2021 میں آسٹریلیاکے صارفین کو بھی اسی طرح کے قانون کے بعد فیس بک پر خبریں شیئر کرنے یا دیکھنے سے روک دیا گیا تھا۔
کینیڈا کا آن لائن نیوز ایکٹ جس کی جمعرات کو سینیٹ نے منظوری دی، ایسے قوانین وضع کرتا ہے جس میں میٹا اور گوگل جیسے پلیٹ فارمز کو تجارتی سودوں پر گفت و شنید کرنے اور خبریں شائع کرنے والے اداروں کو ان کے مواد کی ادائیگی کرنے پر زور دیتا ہے۔
سوشل میڈیا کمپنی ’میٹا‘ نے اس قانون کو ‘بنیادی طور پر ناقص قانون سازی قرار دیتے ہوئے کہا ہے کہ یہ قانون بنانے والے اس حقیقت کو نظر انداز کر رہے ہیں کہ ہمارے سماجی پلیٹ فارمز کیسے کام کرتے ہیں۔‘
میٹا کے ترجمان نے اس قانون سازی کے بعد اعلان کیا کہ کینیڈا میں تمام صارفین کے لیے فیس بک اور انسٹاگرام پر خبریں شائع کرنے یا ان کے لیے خبروں کی دستیابی کا آپشن ختم کر دیا جائے گا-
ترجمان کا کہنا تھا کہ کینیڈا کا قانون ایک ایسا فریم ورک فراہم کر رہا ہے جس میں ہم سے ان خبروں یا موداد کی اشاعت پر بھی پیسے مانگے جا رہے ہیں جو ہم پلیٹ فارمز پر اَپ لوڈ کرتے ہی نہیں ہیں، یہ تو صارفین ہی ہوتے ہیں جو خود اپنے مقاصد کے لیے سوشل میڈیا کا استعمال کرتے ہیں۔
کمپنی نے کہا کہ خبروں کے آپشن کی تبدیلی سے کینیڈا کے صارفین کے لیے پلیٹ فارمز کی دیگر خدمات پر کوئی اثر نہیں پڑے گا۔
گوگل نے اس بل کے موجودہ مندرجات کو ناقابل عمل قرار دیا ہے اور کہا کہ وہ اس مسئلے کے حل کے لیے کینیڈین حکومت کے ساتھ مل کر کام کرے گی۔
ادھر کینیڈا کی مرکزی حکومت کا کہنا ہے کہ آن لائن نیوز بل کینیڈین ڈیجیٹل نیوز مارکیٹ میں انصاف کو بڑھانے کے لیے منظور کیا گیا ہے۔ سوشل میڈیا کے ان پلیٹ فارمز کو خبریں شائع کرنے والے اداروں کو منصفانہ معاوضہ دینے کی ضرورت ہے۔
ادھر ڈیجیٹل میڈیا انڈسٹری گروپس نے بل کی منظوری کو مارکیٹ میں انصاف کی جانب ایک قدم قرار دیا ہے ۔
میڈیا انڈسٹری کے ایک گروپ نیوز میڈیا کینیڈا کے صدر اور چیف ایگزیکٹو آفیسر پال ڈیگن نے کہاکہ حقیقی صحافت کا فروغ ہماری جمہوریت کے لیے نہایت ضروری ہے لیکن اس کے لیے رقم بھی خرچ ہوتی ہے جو صحافتی اداروں کو ملنی چاہیے۔ کینیڈا کا یہ بل ابھی سینیٹ سے منظور ہوا ہے تاہم اس کو نافذ کرنے میں اب بھی 6 ماہ کا عرصہ درکار ہوگا۔
