امریکی ٹیکنالوجی کمپنی ایپل نے اعلان کیا ہے کہ اس کا پہلا فولڈ ایبل اسمارٹ فون ‘آئی فون ڈیو’ جمعے سے اسٹورز پر خریداری کے لیے محدود تعداد میں دستیاب ہوگا، جبکہ آن لائن آرڈرز چند منٹوں میں فروخت ہونے کے بعد بعض صارفین کو فون کی فراہمی کے لیے جنوری تک انتظار کرنا پڑ سکتا ہے۔
خبر رساں ادارے رائٹرز کے مطابق ایپل نے بدھ کو بتایا کہ کمپنی کے اسٹورز پر آنے والے صارفین کو نیا آئی فون ڈیو دیکھنے اور خریدنے کا موقع ملے گا، تاہم اس کی دستیابی مختلف ممالک میں مختلف ہوگی۔
یہ بھی پڑھیں: ایپل کا فولڈ ایبل آئی فون، سام سنگ سے ڈسپلے کی خریداری کا معاہدہ
ایپل نے ستمبر میں اپنا پہلا فولڈ ایبل آئی فون متعارف کرایا تھا۔ تجزیہ کاروں کو توقع ہے کہ یہ فون فولڈ ایبل اسمارٹ فونز کی محدود مگر مہنگی مارکیٹ میں نمایاں مقام حاصل کرسکتا ہے، جہاں سام سنگ الیکٹرانکس اور ہواوے جیسی کمپنیاں پہلے ہی اپنی مصنوعات فروخت کر رہی ہیں۔
رپورٹ کے مطابق آئی فون ڈیو کی تیاری عام آئی فونز کے مقابلے میں زیادہ پیچیدہ ہے۔ اس کے قبضے والے حصے کو اس طرح تیار کرنا ضروری ہے کہ فون بار بار کھولنے اور بند کرنے کے باوجود مؤثر طریقے سے کام کرسکے۔ تجزیہ کاروں کے خیال میں ایپل کو اس فون کی بڑے پیمانے پر تیاری کی صلاحیت بڑھانے میں وقت لگ سکتا ہے۔
ایپل کے مطابق امریکا، آسٹریلیا، کینیڈا، میکسیکو اور برطانیہ سمیت یورپ کے بیشتر حصوں میں آن لائن آرڈرز کی وصولی اور محدود تعداد میں براہ راست اسٹورز سے خریداری کی سہولت دستیاب ہوگی۔
یہ بھی پڑھیں: فولڈ ایبل آئی فون کی تیاری میں ایپل کا انحصار جنوبی کوریا پر کیوں بڑھ گیا؟
تاہم چین، فرانس، ہانگ کانگ، بھارت، جاپان، ملائیشیا، جنوبی کوریا، تائیوان، تھائی لینڈ اور متحدہ عرب امارات سمیت بعض مارکیٹوں میں صرف وہ صارفین فون حاصل کرسکیں گے جنہوں نے پہلے ہی آن لائن آرڈر دیا ہوگا۔
ایپل کے مطابق چین کے زیر انتظام جزیرے مکاؤ میں صارفین اسٹورز پر جا کر بھی محدود تعداد میں آئی فون ڈیو خرید سکیں گے۔
کمپنی کا کہنا ہے کہ وہ نئی ڈیوائس کو جلد از جلد صارفین تک پہنچانے کے لیے کام کر رہی ہے، تاہم ابتدائی مرحلے میں محدود دستیابی کے باعث تمام خریداروں کو فوری طور پر فون ملنا ممکن نہیں ہوگا۔
