سپریم کورٹ نے سپریم جوڈیشل کونسل میں ججز کے خلاف کارروائی کے لیے دائر درخواست کا تحریری فیصلہ جاری کردیا، چھ صفحات پر مشتمل تحریری فیصلہ جسٹس منیب اختر نے تحریر کیا۔
تحریری فیصلے کے مطابق درخواست گزار نے موقف دیا ہے کہ سپریم جوڈیشل کونسل میں ججز کے خلاف شکایت آنے پر وہ ریٹائرڈ ہوجاتے ہیں یا استعفٰی دے جاتے ہیں، یہی وجہ ہے کہ ججز کی ریٹائرمنٹ اور استعفے کی صورت میں شکایت کا مقصد ختم ہو جاتا ہے۔
درخواست گزار کا کہنا ہے کہ ججز کے خلاف شکایت کافیصلہ نہ ہونا انصاف کے بر خلاف ہے۔
سپریم کورٹ نے درخواست گزار کے موقف پر فیصلہ جاری کرتے ہوئے لکھا کہ کونسل کو ججز کے خلاف کارروائی کے لیے ہدایات دینا غیر مناسب ہو گا، سپریم کورٹ جوڈیشل کونسل کو ہدایات دینا کونسل کے اختیارات سنبھالنے کے مترادف ہو گا۔
سپریم کورٹ نے فیصلہ دیا کہ کونسل کو ہدایات دینا آرٹیکل 209 کے برخلاف ہو گا، عدالت کی جانب سے دی گئی ہدایات کونسل کے لیے خود تبدیل کرنا بھی ممکن نہیں ہوگی۔
فیصلے کے مطابق عدالتی ہدایات میں ترمیم کے لیے کونسل کو بھی وقتا فوقتاً عدالت آنا ہوگا۔ کونسل کے پاس اپنی آئینی ذمہ داریوں کے مطابق اختیارات اور طریقہ کار میں ضرورت کے مطابق ترمیم کا اختیار موجود ہے۔
سپریم کورٹ کے مطابق موجودہ کیس میں درخواست گزار کے موقف کو تسلیم کرنا غیر مناسب ہو گا۔
