سری لنکا کے ٹاپ آرڈر بیٹر کمنڈو مینڈس نے کہا ہے کہ ہفتے کے روز قذافی اسٹیڈیم لاہور میں کھیلے گئے ون ڈے سہ ملکی سیریز کے فائنل میں پاکستان کی 3 وکٹوں سے فتح میں اوس (Dew Factor) کا بڑا ہاتھ رہا، جبکہ انہوں نے تسلیم کیا کہ ان کی ٹیم ایک مقابلہ جاتی ہدف دینے سے 20 سے 30 رنز پیچھے رہ گئی۔
فائنل میں 131 رنز کی شاندار اننگز کھیلنے والے کمنڈو مینڈس نے کہا کہ انہوں نے اپنی بیٹنگ کا پورا لطف اٹھایا لیکن اس بات کا دکھ ہے کہ ان کی ٹیم فائنل نہ جیت سکی۔
میچ کے بعد پریس کانفرنس کرتے ہوئے مینڈس نے کہا ’سب سے پہلے تو میں نے اپنی اننگز کو انجوائے کیا، لیکن بدقسمتی سے ہم ہارنے والی ٹیم میں شامل ہیں۔ اگر سچ کہوں تو ہمیں بورڈ پر 20 سے 25 رنز مزید بنانے چاہیے تھے۔‘
یہ بھی پڑھیے فخر زمان، عرفات منہاس کی جارحانہ بیٹنگ، سری لنکا کو شکست، پاکستان نے 18 سال بعد ٹرائی سیریز جیت لی
انہوں نے پاکستان کے فخر زمان کی میچ وننگ سنچری کی تعریف کی اور ساتھ ہی اپنی ٹیم کی فیلڈنگ کی غلطیوں کا بھی ذکر کیا۔
انہوں نے کہا ’فخر زمان نے واقعی بہت زبردست اننگز کھیلی۔ ہم نے فیلڈنگ میں کچھ غلطیاں کیں، لیکن کرکٹ کے کھیل میں ایسا ہو جاتا ہے۔ اس کے باوجود فخر کی بیٹنگ انتہائی عمدہ تھی۔‘
سری لنکن بیٹر نے مزید کہا کہ اب ان کی نظریں ٹیسٹ (ریڈ بال) کرکٹ پر ہیں اور ٹیم کے پاس اس کارکردگی سے آگے بڑھنے کے لیے کافی مثبت چیزیں ہیں۔
ان کا کہنا تھا ’ٹیسٹ کرکٹ کی طرف بڑھنے سے پہلے یہ ہمارے لیے اچھا اشارہ ہے۔ ہم ٹیسٹ فارمیٹ میں بھی بہترین کارکردگی کا مظاہرہ کر رہے ہیں۔ ہمارے پاس ایک بہترین کوچ اور سازگار ماحول ہے۔ ٹیم کے اندر کئی مثبت پہلو ہیں اور ہم ہر روز اور ہر میچ کے ساتھ بہتری کی طرف جا رہے ہیں۔ مجھے امید ہے کہ ہم جلد ہی مزید زبردست کھیل پیش کریں گے۔‘
فائنل میچ پر تبصرہ کرتے ہوئے کمنڈو نے کہا کہ سری لنکن بولرز نے آغاز تو اچھا فراہم کیا تھا لیکن فخر زمان اور سعد بیگ کی شاندار بیٹنگ کو کریڈٹ دینا ہوگا جنہوں نے بہترین کھیل کا مظاہرہ کیا۔ اوس کی وجہ سے انہیں بڑا فائدہ پہنچا لیکن انہوں نے واقعی شاندار کرکٹ کھیلی۔
انہوں نے سہ ملکی سیریز کے تصور کو سراہتے ہوئے کہا کہ اس طرح کے ٹورنامنٹس سے کڑا اور معیاری مقابلہ دیکھنے کو ملتا ہے۔ ہر میچ میں جو ٹیم اس دن بہترین کھیل پیش کرتی ہے وہی فاتح بنتی ہے۔
یہ بھی پڑھیے سہ ملکی ون ڈے سیریز میں فتح، صدر زرداری اور وزیراعظم شہباز شریف کی قومی کرکٹ ٹیم کو مبارکباد
پریس کانفرنس کے دوران سری لنکن بلے باز نے اپنے ساتھی کھلاڑیوں پون رتھنائیکے اور جَنِتھ لیاناگے کی کارکردگی کو بھی بے حد سراہا۔
رتھنائیکے کے بارے میں بات کرتے ہوئے کمنڈو نے بتایا کہ وہ طویل عرصے سے ایک ہی کلب کی طرف سے ساتھ کھیل رہے ہیں اور انہیں ہمیشہ سے یقین تھا کہ رتھنائیکے میں ورلڈ کلاس کھلاڑی بننے کی تمام صلاحیت موجود ہے۔
جَنِتھ لیاناگے کی تعریف کرتے ہوئے انہوں نے کہا کہ اپنے ڈیویکوٹ کے بعد سے جَنِتھ ون ڈے کرکٹ میں مسلسل بہترین کارکردگی دکھا رہے ہیں اور وہ ایک عظیم کھلاڑی بننے کی صلاحیت رکھتے ہیں۔
