مالی سال کے انکم ٹیکس گوشوارے جمع کرانے کی مقررہ آخری تاریخ 31 اکتوبر گزرنے کے بعد آج سے تاخیر سے گوشوارے جمع کرانے والوں کو جرمانے کا سامنا کرنا پڑے گا۔ تاہم ایسے ٹیکس دہندگان کو جرمانے سے استثنیٰ حاصل ہوگا جنہوں نے مقررہ تاریخ سے پہلے ہی گوشوارے جمع کرانے کی مدت میں توسیع کے لیے درخواست دے رکھی ہوگی۔
میڈیا رپورٹس کے مطابق انکم ٹیکس گوشوارے جمع کرانے کی آخری تاریخ تک ملک بھر سے 78 لاکھ سے زیادہ گوشوارے موصول ہوئے۔
دوسری جانب تاجر آسان ٹیکس اسکیم کے تحت مجموعی طور پر 1945 انکم ٹیکس گوشوارے جمع کرائے گئے، جن کے ذریعے 19 کروڑ روپے ٹیکس وصول ہوا۔
میڈیا رپورٹس کے مطابق اکتوبر کے دوران مجموعی طور پر 1013 ارب روپے ٹیکس جمع کیا گیا، جبکہ اس ماہ کے لیے ٹیکس وصولی کا ہدف 1132 ارب روپے مقرر تھا۔
اکتوبر کی ٹیکس وصولی میں 430 ارب روپے انکم ٹیکس اور 425 ارب روپے سیلز ٹیکس کی مد میں حاصل ہوئے۔ اس کے علاوہ فیڈرل ایکسائز ڈیوٹی کی مد میں 80 ارب روپے جبکہ کسٹم ڈیوٹی کی مد میں 118 ارب روپے وصول کیے گئے۔
میڈیا رپورٹس کے مطابق رواں مالی سال کے پہلے 4 ماہ یعنی جولائی سے اکتوبر تک مجموعی طور پر 4099 ارب روپے ٹیکس اکٹھا کیا گیا۔
اس عرصے کے لیے ٹیکس وصولی کا ہدف 4185 ارب روپے مقرر تھا، تاہم مجموعی وصولیاں مقررہ ہدف سے 86 ارب روپے کم رہیں۔
واضح رہے کہ 31 اکتوبر انکم ٹیکس گوشوارے جمع کرانے کی آخری تاریخ تھی، جس کے گزرنے کے بعد یکم نومبر سے تاخیر کے ساتھ گوشوارے جمع کرانے والوں پر جرمانے کا اطلاق ہوگا، البتہ مقررہ وقت پر توسیع کی درخواست دینے والے ٹیکس دہندگان کو اس سے استثنیٰ حاصل ہوگا۔
