پاکستان تحریک انصاف (پی ٹی آئی) نے حکومت اور عالمی مالیاتی فنڈ (آئی ایم ایف) کے درمیان ہونے والے معاہدے کی حمایت کر دی ہے اور کہا ہے کہ پاکستان تحریک انصاف ( پی ٹی آئی ) مجموعی مقاصد اور ملک کی بہتری کے لیے کلیدی پالیسیوں کی حمایت کرتی ہے۔
عالمی مالیاتی فنڈ( آئی ایم ایف) کے وفد سے ملاقات کے بعد پاکستان تحریک انصاف ( پی ٹی آئی ) کی جانب سے جاری بیان میں کہا گیا ہے کہ’ عالمی مالیاتی فنڈ(آئی ایم ایف) کے وفد نے پاکستان تحریک انصاف(پی ٹی آئی) کے چیئرمین عمران خان سے زمان پارک لاہور میں ملاقات کی۔ آئی ایم ایف کے وفد اور چیئرمین پی ٹی آئی کے درمیان ملاقات ایک گھنٹے سے زیادہ وقت تک جاری رہی۔
بیان میں کہا گیا ہے کہ ملاقات میں عالمی مالیاتی فنڈ( آئی ایم ایف) کے کنٹری چیف نیتھن پورٹر نے واشنگٹن سے آن لائن ویڈیو لنک کے ذریعے شرکت کی جب کہ ریذیڈنٹ نمائندہ ایستھر پیریز ملاقات میں باضابطہ طور پر موجود تھے۔
پاکستان تحریک انصاف( پی ٹی آئی )کی ٹیم میں چیئرمین عمران خان، شاہ محمود قریشی، حماد اظہر، شوکت ترین، عمر ایوب خان، ڈاکٹر ثانیہ نشتر، شبلی فراز، تیمور جھگڑا اور مزمل اسلم شامل تھے۔ اس دوران سابق وزیر خزانہ شوکت ترین باضابطہ ملاقات میں موجود نہیں تھے تاہم انہوں نے آن لائن ویڈیو لنک کے ذریعے ملاقات میں شمولیت اختیار کی اور ’آئی ایم ایف‘ کے وفد کو بریفنگ دی۔
پاکستان تحریک انصاف سے چند روز پہلے آئی ایم ایف کی ٹیم نے رابطہ کیا۔ آئی ایم ایف کے ساتھ ۹ ماہ کا سٹینڈ بائی معاہدہ کا مسودہ اگلے ہفتے آئی ایم کے بوڑد کے سامنے واشنگنٹن میں منظوری کے لئے پیش کیا جائے گا۔ اس سلسلے میں تحریک انصاف سے معاہدے کی حمایت کے لئے درخواست کی گئی ہے۔
اس…— Hammad Azhar (@Hammad_Azhar) July 7, 2023
پی ٹی آئی کی پریس ریلیز میں کہا گیا ہے کہ ’ ملاقات میں عالمی مالیاتی فنڈ اور حکومت پاکستان کے درمیان اسٹاف لیول معاہدے جو آئی ایم ایف نے حکومت پاکستان کے ساتھ 9 ماہ کے 3 بلین امریکی ڈالر کے اسٹینڈ بائی ارینجمنٹ کے لیے طے کیا ہے، کے بارے تفصیلی بات چیت ہوئی اور اس تناظر میں پاکستان تحریک انصاف مجموعی مقاصد اور کلیدی پالیسیوں کی حمایت کرتی ہے۔
بیان میں مزید کہا گیا ہے کہ ’ پاکستان تحریک انصاف ( پی ٹی آئی) اس سال کے موسم خزاں میں ہونے والے عام انتخابات سے پہلے اور نئی حکومت کے قیام تک بیرونی مالیاتی اور ٹھوس پالیسیوں کو جاری رکھنے اور میکرو اکنامک استحکام کو برقرار رکھنے کے لیے معاہدے کا خیرمقدم کرتی ہے۔ پاکستان تحریک انصاف کم آمدنی والے طبقات کو مہنگائی سے بچانے کے لیے تمام کوششوں کی بھی حمایت کرتی ہے۔
بیان میں کہا گیا ہے کہ پاکستان تحریک انصاف سیاسی استحکام اور قانون کی حکمرانی کو بھی پاکستان کے معاشی استحکام کے لیے لازمی سمجھتی ہے۔ آئین کے مطابق آزادانہ، منصفانہ اور بروقت انتخابات کے بعد عوام کی طرف سے منتخب کی گئی نئی حکومت اصلاحات کا آغاز کرے گی اور اقتصادی تبدیلی اور جامع ترقی کے لیے اداروں کے ساتھ کثیرالجہتی اور طویل المدتی بنیادوں پر مصروف عمل ہوگی۔
