ملک بھر میں میوزک ہنٹ پروگرام اور فلم فنانس کونسل کا اجراء کیا جا رہا ہے، مریم اورنگزیب

وزیر اطلاعات مریم اورنگزیب نے کہا ہے کہ اسکرین ٹورازم کے ذریعے دنیا میں پاکستان کے اصل کلچر کو اسکرین کے ذریعے دکھایا جائے گا جس کے لیے فلم فنانس کونسل کا اجراء کیا گیا ہے تاکہ اسکرین ٹوارزم کے ذریعے پاکستان کا مثبت بیانیہ اجاگر کیا جائے۔

وفاقی وزیر اطلاعات مریم اورنگزیب نے لاہور میں ریڈیو پاکستان کے مختلف منصوبوں کی افتتاحی تقریب سے خطاب کرتے ہوئے کہاکہ نوجوانوں کو مثبت ذرائع ابلاغ کی اشد ضرورت ہے جس کی وجہ سے حکومت نے پوڈ کاسٹ کے دائرہ کار کو وسیع کرنے کا فیصلہ کیا ہے، ریڈیو اور دیگر ذرائع ابلاغ قومی ورثہ اور وقت کی اشد ضرورت ہیں۔

’فلم، ثقافت اور ورثہ کے ذریعے ہم پاکستان کے امیج کو بہتر کرسکتے ہیں۔‘

انہوں نے کہاکہ پی ٹی آئی نے اپنے دور حکومت میں تمام اداروں کو بری طرح تباہ کیا ہے، چار سال ملک میں نفرت کے بیج بوئے گئے، ایک خاص گروہ سوشل میڈیا کے ذریعے نفرت پھیلا رہا ہے۔

انکا کہنا تھاکہ عوام کو سستی تفریح فراہم کرنے کی کوششیں کر رہے ہیں، نئی پالیسی کے تحت نوجوانوں کو فلم سازی میں مواقع ملیں گے۔ حکومت پاکستان کے دور دراز علاقوں میں میوزک ہنٹ پروگرام شروع کرے گی، 15 جولائی سے اس پروگرام کا آغاز کیا جائے گا۔

’سندھ، بلوچستان، پنجاب، کے پی کے سے ٹیلنٹ کو پاکستان کے عوام تک پہنچایا جائے گا۔‘

انہوں نے کہاکہ ملکی سینما ہاؤسز مختلف وجوہات کی بناء پر پٹرول پمپس اور شادی ہالوں میں تبدیل ہو گئے ہیں، حکومت نے فیصلہ کیا ہےکہ ملک کے  چھوٹے اور بڑے شہروں میں سینما ہاؤسز بنائے جائیں گے۔ سینما ہائوسز کا مقصد نوجوانوں کو سستی تفریح فراہم کرنا ہے۔