روشن ڈیجیٹل اکاؤنٹس کے ذریعے سمندرپار پاکستانیوں کی ترسیلات زر کا حجم 6.350 ارب ڈالر سے تجاوز کر گیا ہے جب کہ آر ڈی اے کے ذریعے پاکستان میں مجموعی طور پر 716 ملین ڈالرکی سرمایہ کاری کی گئی ہے۔
اسٹیٹ بینک کی جانب سے اس حوالے سے جاری کردہ اعدادوشمار کے مطابق جون 2023 کے اختتام پر سمندرپار پاکستانیوں کی جانب سے روشن ڈیجیٹل اکائونٹس کے ذریعہ ترسیلات زر کا حجم 6.335 ملین ڈالر سے تجاوز کر گیا۔ جون کے مہینے میں سمندرپار پاکستانیوں نے آر ڈی اے کے ذریعہ 127 ملین ڈالر کا زرمبادلہ ملک ارسال کیا ہے۔
اعدادوشمار کے مطابق ستمبر 2020 کے بعد سے اب تک سمندرپار پاکستانیوں نے آر ڈی اے کے ذریعے پاکستان میں مجموعی طور پر 716 ملین ڈالر کی سرمایہ کاری کی ہے۔
سمندرپار پاکستانیوں نے ستمبر 2020 سے لے کر اب تک نیا پاکستان سرٹیفکیٹس میں 316 ملین ڈالر، نیا پاکستانی اسلامی سرٹیفکیٹس میں 377 ملین ڈالر اور پاکستان اسٹاک ایکسچینج میں 78 ملین ڈالر کی سرمایہ کاری کی ہے۔
