سویڈن میں قرآن کے بعد دیگر مذہبی کتب نذر آتش کرنے کی اجازت، پاکستان کا شدید ردعمل

پاکستان نے سویڈن میں قرآن کریم کے بعد مقدس کتابوں تورات، انجیل اور زبور کی بے حرمتی اور نذر آتشن کرنے کی اجازت دینے کے فیصلے کی شدید الفاظ میں مذمت کی ہے اور کہا ہے کہ اسلام میں تمام مذاہب، مقدس صحیفوں اور شخصیات کا احترام لازم ہے، پاکستان تمام ممالک سے بھی ان کا احترام کرنے کا مطالبہ کرتا ہے۔

ہفتہ کے روز دفتر خارجہ سے جاری پریس ریلیز میں کہا گیا ہے کہ پاکستان سویڈن میں تورات اور بائبل کی سرعام بے حرمتی کی اجازت دینے کی مذمت کرتا ہے۔ آزادی اظہار رائے کی آڑ میں مذہبی منافرت کی جارحانہ کارروائیوں کو کسی بھی صورت قبول نہیں کیا جا سکتا اور نہ ہی انہیں معاف کیا جا سکتا ہے۔

بیان میں کہا گیا ہے امن کے مذہب کے طور پر دین اسلام میں تمام مذاہب، مقدس شخصیات اور مقدس صحیفوں کا احترام لازم ہے اور پاکستان تمام ممالک سے بھی ان کا احترام کرنے کا مطالبہ کرتا ہے۔

مظاہرین نے احتجاج کی کال واپس لے لی

ادھر اسرائیل کی طرف سے شدید ترین احتجاج کے بعد سویڈن میں تورات جلانے کا اعلان کرنے والے مظاہرین نے اپنا احتجاج واپس لے لیا ہے اور کہا ہے کہ ان کا مقصد مقدس کتابوں کو نذر آتش کرنا نہیں تھا بل کہ دُنیا کے سامنے یہ احتجاج ریکارڈ کرانا تھا اور ان لوگوں کی مذمت کرنا تھا جو آزادی اظہار رائے کی آڑ میں قرآن کریم جیسی مقدس کتابوں کی بے حرمتی کرتے ہیں۔

32 سالہ شامی نژاد سویڈش باشندے نے وضاحت کی کہ ان کا مقصد دراصل ان لوگوں کی مذمت کرنا تھا جو سویڈن میں قرآن پاک جیسی مقدس کتابوں کو جلاتے ہیں۔

سویڈن پولیس نے جمعے کے روز کہا تھا کہ اس نے سٹاک ہوم میں اسرائیلی سفارت خانے کے باہر تورات اور بائبل کو جلانے کے لیے ایک احتجاجی مظاہرے کی اجازت دی ہے۔

اس پر اسرائیل کے صدر اسحاق ہرزوگ اور یہودی تنظیموں نے شدید احتجاج کیا اور سویڈن حکومت سے اس احتجاج کو فوری روکنے کی اپیل کی۔

اس مظاہرے کے منتظم شامی نژاد باشندے احمد نے وضاحت کی کہ ان کا مقصد دراصل مقدس کتابوں کو جلانا نہیں تھا بلکہ ان لوگوں پر تنقید کرنا تھا جنہوں نے حالیہ مہینوں میں سویڈن میں قرآن پاک کے نسخوں کی بے حرمتی کی ہے، جس کی سویڈش حکومت کا قانون ممانعت نہیں کرتا اور نا ہی حکومت کوئی مذمت کر رہی ہے۔

کوئی بھی کتاب نذر آتش کی تو یہاں جنگ چھڑ جائے گی، ہر کوئی ایسا ہی کرے گا: احمد

احمد کا کہنا ہے کہ ‘یہ ان لوگوں کو جواب ہے جو قرآن کو جلاتے ہیں۔ میں یہ دکھانا چاہتا ہوں کہ اظہار رائے کی آزادی کی حدود کیا ہیں؟ اور سویڈن میں ان حدود کا کس حد تک خیال رکھا جا رہا ہے۔

احمد کا کہنا ہے کہ ‘میں یہ دکھانا چاہتا ہوں کہ ہمیں ایک دوسرے کے مذاہب کا احترام کرنا چاہیے کیوں کہ ہم ایک ہی انسانی معاشرے میں رہتے ہیں۔ اگر میں تورات، بائبل یا کسی اور مقدس کتاب (قرآن) کو جلا دوں تو یقیناً یہاں ایک جنگ شروع ہو جائے گی اور ہر کوئی ایسا فعل سرانجام دینا شروع ہو جائے گا اس لیے ہم اس طرح کے احتجاج کو واپس لے رہے ہیں، میں جو دکھانا چاہتا تھا وہ یہ تھا کہ مقدس کتابوں کی بے حرمتی کرنا قطعاً درست نہیں ہے۔‘

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں