سپریم کورٹ آف پاکستان میں وکیل کے قتل کے مقدمے میں نامزدگی کے خلاف چیئرمین پی ٹی آئی عمران خان کی درخواست 20 جولائی کو سماعت کے لیے مقرر کر دی گئی ہے۔
سپریم کورٹ کے جج جسٹس یحییٰ آفریدی کی سربراہی میں 3 رکنی بینچ درخواست پر سماعت کرے گا۔ بینچ میں جسٹس مظاہر علی اکبر نقوی اور جسٹس مسرت ہلالی شامل ہیں۔
واضح رہے کہ 6 جون کو کوئٹہ کے نواحی علاقے ایئرپورٹ روڈ پر نامعلوم مسلح افراد نے ایک گاڑی پر فائرنگ کردی تھی جس کے نتیجے میں وکیل عبدالرزاق جاں بحق ہوگئے تھے۔
مزید پڑھیں
عبدالرزاق ایڈووکیٹ سابق وزیراعظم عمران خان کے خلاف سنگین غداری کے کیس میں درخواست گزار تھے۔
عبدالرزاق کی جانب سے بلوچستان ہائیکورٹ میں دائر آئینی درخواست میں عمران خان کےخلاف آئین کے آرٹیکل 6 کےتحت کارروائی شروع کرنے کی استدعا کی گئی تھی، جس کی سماعت 7 جون کو ہونا تھی۔
عبدالرزاق شر کے قتل کے اگلے ہی روز ان کے قتل کا مقدمہ درج کیا گیا جس میں سابق وزیراعظم و چیئرمین پی ٹی آئی عمران خان کو نامزد کیا گیا تھا۔
سابق وزیراعظم عمران خان کے خلاف درج مقدمے کے مطابق مدعی سراج احمد نے مؤقف اختیار کیا کہ ان کے والد نے عمران خان کے خلاف ہائی کورٹ میں پیٹیشن دائر کی ہوئی تھی اور اس بات کا قوی امکان ہے کہ انہیں عمران خان اور ان کی پارٹی کے افراد نے اسی رنجش کی بنیاد پر قتل کیا۔
یہ بھی یاد رہے کہ سپریم کورٹ آف پاکستان نے 4 جولائی کو عمران خان کی کوئٹہ میں قتل ہونے والے وکیل عبدالرزاق شرکے مقدمے میں عبوری ضمانت اورہائیکورٹ کے فیصلے پرحکم امتناع جاری کرنے کی استدعا مسترد کردی تھی۔
