پاکستان نے کہا ہے کہ دہشت گردی پاکستان کے لیے سنجیدہ مسئلہ ہے جس کو متعدد بار افغانستان سے متعدد فورمز پر اٹھایا آصف درانی کے حالیہ دورہ افغانستان میں باہمی تحفظات کے معاملات پر تبادلہ خیال کیا گیا۔
صحافیوں کو ہفتہ وار بریفنگ کے دوران ترجمان دفتر خارجہ ممتاز زہرا بلوچ نے کہا ہے کہ پاکستان کے نمائندہ خصوصی آصف درانی نے 19 جولائی تا 21جولائی افغانستان کا دورہ کیا، اس دوران انہوں نے افغان عبوری قائمقام وزیر اعظم ملا عبدالکبیر، قائمقام وزیر خارجہ امیر خان متقی سمیت افغان حکام سے ملاقاتیں کیں۔
دفتر خارجہ کے مطابق دہشت گردی پاکستان کے لیے سنجیدہ مسئلہ ہے جس کو متعدد بار افغانستان سے متعدد فورمز پر اٹھایا، آصف درانی کے حالیہ دورہ افغانستان میں باہمی تحفظات کے معاملات پر تبادلہ خیال کیا گیا۔
دفتر خارجہ کے مطابق سہ فریقی مذاکرات کی دستاویز میں افغانستان نے پاکستان اور چین کو ٹی ٹی پی سمیت کالعدم گروہوں کے اپنی سرزمین استعمال نہ کرنے دینے کی یقین دھانی کرائی تھی، دورے میں افغانستان سے دہشت گردی سمیت تمام معاملات اٹھائے گئے ہیں۔
کشمیر کے حوالے سے بات کرتے ہوئے ممتاز زہرا بلوچ نے کہا کہ آزاد جموں و کشمیر نہ کبھی بھارت کا حصہ رہا نہ کبھی ہو گا۔ بھارت خواب دیکھتا رہے۔ گوا میں ایس سی او وزراءِ خارجہ اجلاس میں بھارت نے بیانات دے کر پہل کی، وزیر خارجہ نے تو بھارتی صحافیوں و میڈیا کے سوالات کے جوابات دیے بھارت کو ایس سی او کو سیاسی رنگ نہیں دینا چاہیے۔
ترجمان دفتر خارجہ نے سیما حیدر کے حوالے سے کہا کہ سیما حیدر پر رپورٹس و بیانات دیکھے ہیں، پاکستانی شہری ہونے کی صورت میں بھارتی قونصلر رسائی دیے جانے کا انتظار ہے۔
انہوں نے امریکی وفد کے دورہ پاکستان کے حوالے سے بتایا کہ نیشنل سیکیورٹی کونسل میں ڈائریکٹر جنوبی ایشیا ایلیئن لاوباچار نے اعلیٰ سطح کے وفد کے ہمراہ پاکستان کا دو روزہ دورہ کیا۔
انہوں سائفر کے ضمن میں پوچھے گئے سوال پر کہا کہ آفیشل سیکرٹ ایکٹ کے باعث سائفر کے معاملہ پر تبصرہ کرنے سے قاصر ہیں۔
یونان کشتی حادثہ کے متعلق ان کا کہنا تھا کہ حادثے کا شکار 4 افراد کی نعشوں کو اسلام آباد اور لاہور آنے والی 2 پروازوں کے ذریعہ پاکستان پہنچا دیا گیا ہے۔
