وزیر اعلی سندھ مراد علی شاہ نے آئی جی سندھ پولیس غلام نبی میمن کے ہمراہ گھوٹکی کا دورہ کیا اور کچے کے علاقے بیلا میرپور کی چوکی نمبر 40 کا معائنہ کیا۔ وزیر اعلی نے سیڑھی چڑھ کر پولیس چوکی سے علاقے کا معائنہ بھی کیا، جہاں ڈاکوؤں نے اندھیر نگری مچا رکھی ہے۔
وزیر اعلی مراد علی شاہ کچے کی پولیس چوکی بھی گئے اور پولیس اہلکاروں سے ملاقات کی۔ انہوں نے گھوٹکی بچاؤ بند کا بھی دورہ کیا۔ انہوں نے سندھ پولیس چیف کو بہترین منصوبہ بندی کے ساتھ پورا کچے کا علاقہ ڈاکوؤں سے پاک کرنے کی ہدایت بھی کی۔
آئی جی سندھ پولیس غلام نبی میمن نے کچے کے علاقے میں ڈاکوؤں کیخلاف آپریشن پر بریفنگ دیتے ہوئے بتایا کہ 54 ہزار ایکڑ کچے کا علاقہ ڈاکوں سے کلیئر کرایا جاچکا ہے۔ 52 ڈاکو ہلاک جب کہ 70 مغوی بازیاب کرائے گئے ہیں۔ ڈاکوؤں کے 85 سہولت کار گرفتار بھی کیے گئے ہیں۔
آئی جی سندھ پولیس کے مطابق کچے میں 170 پولیس چیک پوسٹس قائم کی گئی ہیں، جہاں 1360 پولیس اہلکار اپنے فرائض انجام دے رہے ہیں۔ رانوتی کے کچے میں 100 چیک پوسٹس قائم کی گئی ہیں۔ وزیر اعلیٰ سندھ نے تمام پولیس چیک پوسٹس کو پکا کرنے کی ہدایت کی۔
وزیراعلیٰ سندھ مراد علی شاہ نے کچے میں تعینات پولیس اہلکاروں کو جدید اسلحہ فراہم کرنے کی ہدایت کرتے ہوئے کہا کہ کچے کی پولیس کے لیے وہ فوج سے جدید اور حساس نوعیت کے اسلحے کے حصول کی کوشش کریں گے۔