پاکستان اور چین کے درمیان وفود کی سطح پر اہم مذاکرات آج اسلام آباد میں ہوں گے۔ سی پیک سمیت متعدد شعبوں میں تعاون کی یادداشتوں پر دستخط کیے جائیں گے۔ چینی نائب وزیراعظم لی فینگ کے وزیراعظم ہاؤس پہنچنے پر وزیراعظم شہباز شریف نے ان کا پرتپاک استقبال کیا۔
سی پیک کے 10 سال مکمل ہونے پر چین کے نائب وزیراعظم لی فینگ 3 روزہ دورے پر پاکستان پہنچ چکے ہیں جو اسلام آباد میں مصروف ترین دن گزاریں گے۔ معزز مہمان وزیر اعظم ہاؤس میں پہنچ چکے ہیں، جہاں وزیراعظم شہبازشریف نے کابینہ ارکان کے ہمراہ ان کا استقبال کیا، وزیراعظم شہبازشریف چین کے نائب وزیراعظم اور ان کے وفد کے اعزاز میں ظہرانہ بھی دیں گے۔
چین کے نائب وزیراعظم اور وزیراعظم شہبازشریف کے مابین ون آن ون ملاقات ہوگی، دونوں ممالک کے مابین سی پیک سمیت متعدد شعبوں سے متعلق تعاون کی یادداشتوں پر دستخط کیے جائیں گے۔
چین کے نائب وزیراعظم لی فینگ آج ایوان صدر بھی جائیں گے جہاں وہ صدر ممکت عارف علوی سے ملاقات کریں گے۔ ایوان صدر میں چین کے نائب وزیراعظم کو پاکستان کے اعلیٰ ترین سول اعزاز ’ہلال پاکستان‘ سے نوازا جائے گا۔
مہمان نائب وزیراعظم کنونشن سینٹر اسلام آباد میں سی پیک کی 10 سالہ تقریب ’ڈیکیڈ آف سی پیک‘ میں بھی شرکت کریں گے۔ وزیراعظم محمد شہبازشریف بھی تقریب میں موجود ہوں گے۔
کنونشن میں سی پیک منصوبوں پر کام کرنے والی چینی اور دیگر کمپنیوں کو ایوارڈز سے نوازا جائے گا، سی پیک کے 10 سال مکمل ہونے پر منعقدہ تقریب کے اختتام پر آتش بازی کا شاندار مظاہرہ بھی کیا جائے گا۔
چین کے نائب وزیراعظم کا گرمجوشی سے استقبال کرنے پر خوشی ہوئی، وزیراعظم شہباز شریف
وزیراعظم محمد شہباز شریف نے کہا ہے کہ چین کے نائب وزیراعظم اوروفد کا پاکستان آمد پر گرمجوشی سے استقبال کرنے پر خوشی ہوئی۔ وزیراعظم محمد شہباز شریف نے اپنے ٹوئیٹ میں کہا کہ ہے لی فینگ اور ان کا وفد سی پیک کی 10ویں سالگرہ کی تقریبات میں شرکت کرے گا۔ وزیراعظم نے کہاکہ چین کا اعلیٰ سطح کا وفد گیم چینجر منصوبے کے تحت ہونے والی پیشرفت کا بھی مشاہدہ کرے گا۔
It is my pleasure to warmly welcome the Chinese Vice-Premier H.E. He Lifeng and members of his delegation to Pakistan. They are visiting Pakistan to join us in celebrating the 10th anniversary of CPEC and witnessing first-hand the transformations brought about by this…
— Shehbaz Sharif (@CMShehbaz) July 31, 2023
واضح رہے کہ چین کے نائب وزیراعظم لی فینگ کے دورہ پاکستان کے موقع پر اسلام آباد میں عام تعطیل کا اعلان کیا گیا ہے۔ آج 31 جولائی اور کل یکم اگست کو اسلام آباد میں عام تعطیل ہوگی۔
کے ایس ای 100 انڈیکس 24 ماہ بعد 48000 کی حد عبور کرگیا
سی پیک کی کامیابی پر چینی نائب وزیراعظم کی پاکستان آمد، ریفائنری سیکٹر میں بیرونی سرمایہ کاری کے اعلانات کے بعد اسٹاک مارکیٹ 24 ماہ بعد 48000 کی حد عبور کر گیا ہے۔
پاکستان اسٹاک ایکسچینج میں ریکارڈ تیزی، 2023 میں پہلی بار 100 انڈیکس 48000 کی حد عبور کر گیا ہے۔ کے ایس ای 100 انڈیکس ایک ہزار پوائنٹس پلس ہوگیا ہے۔ سرمایہ کاروں کا اعتماد بحال، انٹرسٹ ریٹ میں اضافے کی نفی کی خبر بھی مارکیٹ پر اثر انداز نہیں ہو سکی۔
