خیبر پختونخوا میں 2 تحصیل چیئرمینوں کی خالی نشستوں پر ضمنی انتخابات ہوئے ہیں اور پشاور کی تحصیل کونسل متھرا سے پاکستان تحریک انصاف کے امیدوار انعام اللہ 20 ہزار 333 ووٹ لے کر کامیاب ہو گئے ہیں جبکہ جمعیت علمائے اسلام کے امیدوار 13 ہزار 564 ووٹ حاصل کرکے دوسرے نمبر پر رہے ہیں۔
جماعت اسلامی کے امیدوار افتخار احمد 9 ہزار 546 ووٹ لے کر تیسرے نمبر پر رہے۔ یہ نشست جے یو آئی کے فرید اللہ کی وفات کے باعث خالی ہوئی تھی۔
حویلیاں میں آزاد امیدوار عزیر خان آگے
دوسری جانب حویلیاں میں اب تک 134 میں سے 103 پولنگ اسٹیشز کے نتائج سامنے آئے ہیں جن کے مطابق آزاد امیدوار عزیر شیر خان 17 ہزار 203 ووٹ لے کر پہلے نمبر پر موجود ہیں۔
پاکستان تحریک انصاف (پی ٹی آئی) کے امیدوار کا 14 ہزار 648 ووٹ لے کر دوسرا نمبر ہے۔ جبکہ مسلم لیگ ن کے امیدوار نے اب تک 11 ہزار 225 ووٹ حاصل کیے ہیں اور تیسرے نمبر پر موجود ہے۔
تحصیل کونسل حویلیاں کی نشست تحصیل ناظم عاطف منصف خان کے قتل کے باعث خالی ہوئی تھی۔ عاطف خان آزاد حیثیت سےکامیاب ہو کر پی ٹی آئی میں شامل ہو ئے تھے۔ اب ان کے کزن عزیر شیر خان آزاد حیثیت میں انتخابات میں حصہ لے رہے ہیں اور اب تک کے نتائج کے مطابق پہلے نمبر پر موجود ہیں۔
